Ձեր վստահելի աղբյուրը

Ընտանեկան բռնության կանխարգելման մասին օրենքի նախագիծը մի քանի օր առաջ հրապարակվել է, այն դրվել է քվեարկության: Այս պահի դրությամբ, քվեարկողների 53 տոկոսը կողմ է նախագծի ընդունմանը, 47 տոկոսը՝ դեմ:

«Մեդիա կենտրոնում» կազմակերպված քննարկման ժամանակ ՀՀ Արդարադատության նախարարության «Օրենսդրության զարգացման և իրավական հետազոտությունների կենտրոն» հիմնադրամի հետ կապերի բաժնի պետ Գոհար Հակոբյանը նշեց, որ նախագծի  ընդունմամբ ակնկալվում է ապահովել ընտանեկան բռնության կանխարգելման կազմակերպաիրավական հիմքերը, ընտանեկան բռնության ենթարկված անձանց պաշտպանությունն ու անվտանգությունը, արդարադատության մատչելիությունը, նրանց տրամադրել անհրաժեշտ օգնություն:

Օրենքը սահմանում է, որ ոստիկանությունը, տուժածի դիմումի հիման վրա նաև դատարանը կարող է սահմանափակումներ կիրառել բռնարարի նկատմամբ:

«Կարելի է հրահանգ տալ, որպեսզի բռնություն գործադրած անձն անմիջապես լքի բռնության ենթարկված անձի բնակության վայրը, անգամ եթե այն սեփականության իրավունքով իրեն է պատկանում: Անմիջապես հանձնել իր տիրապետության տակ եղած զենքը, չկապվել բռնության ենթարկված անձի հետ հեռախոսակապով կամ հաղորդակցության այլ միջոցներով, չայցելել նրան կամ նրա խնամքի ներքո եղած անձանց, չմոտենալ նրան 100 մ շառավղով»,-սահմանափակումները թվարկեց ԱՆ ներկայացուցիչը:

Սահմանափակումներին չենթարկվելու դեպքում նախագիծը սահմանում է պատասխանատվություն, ընդհուպ քրեական, ինչպես առաջարկել են քաղաքացիական հասարակության ներկայացուցիչները:

Գ. Հակոբյանն ասաց, եթե նախագիծն իրավական ուժ ստանա, ապա ապաստարանների հիմնադրման պարտավորությունը ստանձնելու է պետությունը:

«Ես draft.am-ում տեղադրված կարծիքներից հասկացա, որ մեր մտահոգություն կա, որ նախագծերով կարելի է վերցնել երեխաներին ընտանիքից, տալ որդեգրման, կազմաքանդել ընտանիքները: Ես ուզում եմ փարատել այդ մտահոգությունները, ասել, որ ծնողական իրավունքներից զրկելու կամ դրանք սահմանափակելու մասին խոսք չկա այս օրենքում: Այս ոլորտում շարունակելու են գործել Ընտանեկան օրենսգրքի դրույթները»,-ասաց նա:

Քննարկման մասնակիցներից Ընդդեմ կանանց նկատմամբ բռնության կոալիցիայի ծրագրերի ղեկավար Զառա Հովհաննիսյանն առաջընթաց որակեց, որ պետությունը քաղաքական կամք դրսևորեց հարցի վերաբերյալ:

«Բավական երկար աշխատանք է տարվել, հանդիպումներ են եղել քաղհասարակության ներկայացուցիչների հետ, ներկայացված առաջարկների մի մասն ընդգրկվել է նախագծում»,-ասաց Զ. Հովհաննիսյանը:

Նա նշեց, որ օրինագծի վերաբերյալ բավականին լուրջ դիմադրություն կա. «Կարող եմ ասել, որ դա մշակութային դիմադրություն է: Չեմ ասում, որ նման մարդիկ շատ են, գերակշռող են, բայց բավականին ագրեսիվ են: Մարդիկ այնպիսի ընկալում ունեն, որ ընտանիքն անձի սեփականությունն է, այնտեղ կարող են անել այն, ինչ ցանկանան»:

Նա հույս հայտնեց, որ քայլ առ քայլ պետք է հասնել այն բանին, որ ընտանեկան բռնությունը որակվի որպես քրեական հանցագործություն: