Ձեր վստահելի աղբյուրը

Հոկտեմբերի 11-ին կմեկնարկի Խաչատրյանի անվան միջազգային 5-րդ փառատոնը։ Այն այս տարի նվիրված է Հովհաննես Այվազովսկու 200-ամյա հոբելյանին։ Մինչև  դեկտեմբերի 11-ը շարունակվող փառատոնի ընթացքում կայանալու են բազմաթիվ սիմֆոնիկ և կամերային համերգներ, որոնց ընթացքում կհնչեն նաև պրեմիերաներ։

«Կունենանք մատչելի, պոպուլյար, բարդ ծրագրեր, Հայաստան կգան մեզ, աշխարհի համար կարևոր արտիստներ: Եթե մեզ ու աշխարհի համար նույն արտիստներն են կարևոր, նշանակում է, որ մեծ հաջողություն է փառատոնի համար»,- լրագրողների հետ հանդիպմանն ասաց Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը՝ հավելելով, որ փառատոնի ընթացքում դոմինանտ է լինելու Արամ Խաչատրյանի երաժշտությունը:

Փառատոնը մեկնարկելու է Հայաստանի պետական երիտասարդական նվագախմբի հետ ամերիկացի դերասան, պրոդյուսեր, ռեժիսոր, սցենարիստ Ջոն Մալկովիչի ելույթով՝  դիրիժոր Սերգեյ Սմբատյանի ղեկավարությամբ:

«Մեծ ձեռքբերում է: Շատ եմ կարևորում այդ համերգը, քանի որ կան արտիստներ, ծրագրեր, որոնք հայտնի են աշխարհում, հետևում է ողջ աշխարհը: Կարծում եմ՝ հոկտեմբերի 11-ի համերգը հենց այդպիսինն է լինելու, քանի որ Հայաստանում ելույթ է ունենալու հայտնի արտիստ Մալկովիչը, ծրագիրն էլ յուրահատուկ է»,- ասաց Ս. Սմբատյանը:

Նա նշեց, որ այդ ծրագրի վրա երկար են աշխատել, պրեմիերան կայացել է երկու տարի առաջ Սեուլում:

«Նման ծրագրով հանդես գալու գաղափարը  Ջոնինն է: Մենք ունենք ընդհանուր պրոդյուսերական թիմ, որը կարողացավ ստեղծել այդ պրոեկտը»,- ասաց նա:

Համերգին Մալկովիչը կներկայացնի հատված Էռնեստո Սաբատոյի «Հերոսների և գերեզմանների մասին» նովելից՝ 20-րդ դարի 2-րդ կեսի ամենանշանավոր կոմպոզիտորներից մեկի՝ Ալֆրեդ Շնիտկեի դաշնամուրի և նվագախմբի համար գրված կոնցերտի ուղեկցությամբ։ Որպես մենակատար հանդես կգա ճանաչված դաշնակահարուհի Անաստասիա Տերենկովան։

«Երբ կարդացի տեքստը, հասկացա, որ երաժշտությունը պետք է լինի ոչ միստիկ, ոչ շատ բարդ, ոչ շատ  հայտնի դասական: Այդ միաձուլումը ստացվեց՝ թատրոնի, տեքստային ասելիքը, բովանդակությունը, երաժշտութունը, նվագախմբի քանակը»,- նշեց դիրիժորը:

Փառատոնի ընթացքում կներկայացվեն Սերժ Թանկյանի «Օրկա» սիմֆոնիան, «Խաչատրյանը և ջազը» համերգային նախագիծը, հանդես կգան հայտնի արտիստներ՝ դաշնակահարներ Գլորիա Քամփաները, Հայկ Մելիքյանը, Լևոն Կարապետյանը, ջութակահարներ Դավիդ Նեբելը, Մարկ Բուշկովը, մեներգիչ Վլադիմիր Բայկովը (բաս) և ուրիշներ:

Ս. Սմբատյանի խոսքով, «Խաչատրյանը և ջազը» նախագիծը մեծ հաջողություն  ունի Հայաստանում, նաև Հայաստանից դուրս, ինչը նույնպես վկայում է փառատոնի հաջողության մասին:

«Եթե փառատոնը կարողանում է միջազգային որակի նոր հնչողություն առաջարկել, նոր շունչ տալ, մեծագույն հաջողություն է»,- ասաց նա՝ հավելելով, որ նախագծի շրջանակում կան նոր գործեր, մշակումներ, լինելու է ներկայացման նոր ֆորմատ:

Խոսելով փառատոնի մասին, Սերգեյ Սմբատյանը նշեց, որ այս հինգ տարիների ընթացքում 40 արտիստ է եկել Հայաստան, ավելի քան 15 համաշխարհային պրեմիերա է եղել:

«Դեռ շատ անելիքներ ունենք, մտածում ենք ոչ ստանդարտ ծրագրերի մասին, արտիստների, ովքեր ստեղծում են նոր գաղափարներ»,- ասաց Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը: