Ձեր վստահելի աղբյուրը

Հայկական կոնյակագործության 130-ամյակին և նոր պատմական շրջանի նախօրեին Երևանի կոնյակի գործարանը ներկայացնում է բացառիկ արտադրանք՝ ARARAT Single Cask, թողարկված սահմանափակ քանակությամբ և համարակալված շշերով:

Single Cask ալկոհոլային խմիչքի շնորհանդեսը տեղի ունեցավ Երևանի կոնյակի գործարանի Բերդ մասնաճյուղում:

Երևանի կոնյակի գործարանի արտադրության տնօրեն Համլետ Անտոնյանը ներկայացնելով նոր խմիչքի ստեղծման պատմությունը, նշեց, որ գործարանի վարպետները չեն դադարում նոր՝ հայկական հողի ջերմությունն ու բերրիությունը արտացոլող գաղափարներ որոնել: Ստեղծագործական պրպտումների արդյունքում ստեղծված նոր խմիչքը պատրաստված է բացառապես Երևանի կոնյակի գործարանի պրեմիում դասի սպիրտներից՝ ստացված և հնացված Հայաստանի Տավուշի մարզի յուրահատուկ կլիմայական պայմաններում:

Համլետ Անտոնյանն ասաց, որ ARARAT Single Cask-ը հայկական կոնյակագործության մեջ բացարձակ նորարարություն է, որը խորհրդանշորեն թողարկվում է հոբելյանական տարում՝ ի նշան պատմական նոր շեմի հատման և պահանջկոտ ապագային ժամանակակից որոշումներ ներկայացնելու պատրաստակամության:

Այն  57 տոկոս թնդություն ունեցող արտադրանք է՝ պատրաստված բացառապես Տավուշի մարզի խաղողից, որը հայտնի է մեղմ կլիմայով և բյուրեղյա մաքուր օդով, որոնք սպիրտներին հաղորդում են բացառապես նուրբ և յուրահատուկ այնպիսի առանձնահատկություններ, որոնք, անկասկած, արժանի են մաքուր, ոչ կուպաժավորված վայելքի:

«Հպարտ եմ, որ ներկայացնում եմ ԵԿԳ-ի նորարարությունը, որ բացառիկ է Հայաստանի կոնյակագործության մեջ: Single Cask-ն իր մեջ ներառում է Տավուշում  ապրող մարդկանց կամքի ուժն ու տոկոնությունը, այստեղի հրաշք բնակլիմայական պայմանների նրբությունը»,- ասում է ԵԿԳ-ի  արտադրության տնօրենը:

Կրկնակի թորման միասնական գործընթացը և հնացումը մեկ տակառում առանց հետագա կուպաժավորման Single Cask-ը դարձնում են շրջանի բնակլիմայական առանձնահատկությունների առավել ամբողջական և բնածին արտացոլումը: Մառանում ստեղծված հատուկ պայմանները հնացումը դարձնում են առավել մեղմ և ապահովում են սպիրտների անկրկնելի նրբությունն ու բազմերանգությունը:

ARARAT Single Cask-ը ԱՐԱՐԱՏ տեսականու միակ արտադրանքն է, որը շրջանցում է ցրտով մշակման և ֆիլտրման փուլը, ինչը թույլ է տալիս էլ ավելի համային նոտաներ և բույրի երանգներ պահպանել՝ միաժամանակ ընդգծելով խմիչքի իսկությունը:

ARARAT Single Cask-ն առանձնանում է յուրօրինակ երանգով, որը փորձագիտական հանձնաժողովը անվանել է «հայկական աշնանային մայրամուտի գույն»: Այն ունի ուժեղ, ծավալուն, բազմաբնույթ և հագեցած համ: Խմիչքի բնույթը դրսևորվում է փայտի և ծխի համահոտային ներդաշնակ համադրությամբ՝ վանիլի և անուշաբույր դարչինի երանգավորմամբ:

ARARAT Single Cask-ի սահմանափակ թողարկման համար ԵԿԳ-ի վարպետները երեք տակառ են ընտրել: Նորարարական շարքի յուրաքանչյուր շշի վրա հատուկ հրավիրված մասնագետի ձեռքով գրված է համար, որը ցույց է տալիս, թե որ տակառում է հնացվել սպիրտը:

«ԵԿԳ-ի նոր արտադրանքի հիմքում ընկած է մինիմալիզմի շքեղությունն և կրաֆտ գաղափարը, որն էլ արտացոլվել է ժամանակակից փայտյա փաթեթավորման մեջ, իսկ Արարատ լեռան ուրվագծմամբ պիտակների կոմպոզիցիան ընդգծում են խմիչքի շքեղ գույնը»,- ասում է Համլետ Անտոնյանը:

Նրա խոսքերով՝ ալկոհոլային խմիչքը սահմանափակ քանակությամբ է, թողարկվել է ընդամենը 1440 շիշ: 0,75 լիտր տարողությամբ յուրաքանչյուր մեկ շիշ խմիչքի  արժեքը 90 հազար դրամ է: ARARAT Single Cask-ը կվաճառվի նոյեմբերի 1-ից միայն Հայաստանում: 

Կոնյակագործության ողջ պատմության ընթացքում հայ վարպետները երբեք չեն վարանել ընդլայնել կոնյակագործության սահմանները և բոլոր ժամանակներում հանդես են եկել նորարար լուծումներով, որոնք շատ շուտ անխախտելի կանոն են դարձել: Այդպես նախորդ դարասկզբին Մկրտիչ Մուսինյանցը ստեղծում է առաջին տեսակավոր հայկական կոնյակը՝ սկզբնավորելով հայկական կոնյակների փառահեղ ապագան: Մի քանի տասնամյակ անց՝ 20-րդ դարի կեսերին, հայկական կոնյակագործության վարպետ Մարգար Սեդրակյանը հեղափոխական միտք է առաջարկում, որը կայանում էր թորած ջուրը «կենդանի ջրով» փոխարինելու մեջ: Ժամանակին նորարարական այս գաղափարն արդյունքում դարձավ հայկական կոնյակագործության ոսկե օրենքը: ARARAT Single Cask-ը ԱՐԱՐԱՏ-ի նորարարությունների ներդաշնակ շարունակությունն է հատընտիրը գնահատողների համար, որը փոխաբերականորեն կարելի անվանել «Մեկ վրձնահարվածի կտավ»՝ կատարված տակառից գավաթ ամենակարճ ճանապարհի տեխնիկայով: