Ձեր վստահելի աղբյուրը

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվեց «Սամվել Բաբայանի և մյուսների գործով» դատական  նիստը: Հրապարակվեցին փողերի լվացման մեջ մեղադրվող ամբաստանյալներից երեքի ցուցմունքները: Փողերի լվացման դրվագով Սամվել Բաբայանն առանձին չհարցաքննվեց, նախագահող դատավոր Արշակ Վարդանյանն ասաց, որ Ս. Բաբայանը հաջորդ նիստին ցուցմունք կտա երկու դրվագի վերաբերյալ էլ: 

Սամվել Բաբայանը, Սանասար Գաբրիելյանը, Արմեն Պողոսյանը կհարցաքննվեն հաջորդ նիստին՝ հոկտեմբերի 16-ին:

Սամվել Բաբայանը հետաքրքրվեց, թե ի՞նչ հերթականությամբ են հարցաքննվելու:

«Մնացածը տալո՞ւ են, հետո ես, թե՞ հակառակը»,- հարցրեց նա:

Դատավորն ասաց, որ կարող է թողնել  ամբաստանյալների հայեցողությանը, ապա հավելեց. «Տեղում՝ նիստի ընթացքում կորոշենք, նաև հաշվի առնելով ձեր կարծիքը»:

Հիշեցնենք, որ Սամվել Բաբայանին մեղադրանք է առաջադրվել այն բանի համար, որ նա դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահռթիռային համալիր ձեռք բերելուն, փոխադրելուն և պահելուն, ինչպես նաև փոխարկման արդյունքում ձեռք է բերել հանցավոր ճանապարհով ստացված գույք:

Սանասար Գաբրիելյանին մեղադրանք է առաջադրվել այն բանի համար, որ նա մի խումբ անձանց հետ` նախնական համաձայնությամբ ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահռթիռային համալիր:

Արմեն Պողոսյանին մեղադրանք է առաջադրվել այն բանի համար, որ նա մի խումբ անձանց հետ` նախնական համաձայնությամբ ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահռթիռային համալիր: