Ձեր վստահելի աղբյուրը

«Տարկետման իրավունքն այսօր այս ձևով, իհարկե, արդարություն ապահովել չի կարող: Մենք կողմ ենք այն դրույթներին, որոնք վերաբերում են վերջին հաշվով այդ սկզբունքի վերացմանը կամ  ավելի ճիշտ՝ դրա ավելի ստույգ դարձնելուն»,- Ազգային ժողովի պաշտպանության և  անվտանգության հարցերի մշտական հանձնաժողովի նախաձեռնությամբ «Զինապարտության և զինվորական ծառայության մասին օրենսդրական նոր կարգավորումների վերաբերյալ» թեմայով խորհրդարանական լսումների ժամանակ ասաց Երևանի պետական համալսարանի ռեկտոր Արամ Սիմոնյանը:

Նա նշեց, որ թեև այս հարցի շուրջ մի քանի անգամ մտքեր փոխանել է պաշտպանության, կրթության և գիտության նախարարների հետ, բայց կան մի քանի խնդիրներ, որոնք ցանկանում է բարձրաձանել: 

«Առաջին խնդիրը վերաբերում է բակալավրիատի ուսանողների  առաջին կիսամյակն ավարտելուն կամ չավարտելուն և անմիջապես բանակ զորակոչվելուն: Մեր բուհերի խնդրանքն էր եղել, որպեսզի հնարավորություն տրվի առաջին  կուրսի ուսանողներին ավարտել այդ կիսամյակը ու  նոր զորակոչվել բանակ: Այս խնդիրը  կապված է նաև ժամանակի խնայողության հետ:

Բակալավրիատը չորս տարի է, որից հետո երկու տարի ծառայում է բանակում,  հետո վերադառնում է ու երկու տարի շարունակում է  ուսումը մագիստրատուրայում, հետո ևս երկու տարի՝ ասպիրանտուրայում: Բնականաբար, 30 տարեկան դարձած նոր միայն կարող է որպես թեկնածու մուտք գործել գիտություն: Սա բավականին մեծ տարիք է, և երիտասարդ գիտնական հասկացությունը մեջտեղից դուրս է գալիս:

Գոնե  հնարավորություն տրվի, որպեսզի ուսանողը բակալավարիատի առաջին կիսամյակի  քննությունները հանձնի, փակի կիսամյակը, նոր միայն զորակոչվի բանակ: Այս խնդիրն իսկապես մեզ համար բավականին մեծ նշանակություն ունի»,- ասաց ԵՊՀ ռեկտորը: 

Արամ Սիմոնյանը նշեց, որ խիստ դեմ է այն կարծիքներին, որ արևմտյան համալսարաններում սովորող բոլոր անձիք ստանան տարկետում:

«Նույնիսկ լավագույն ամերիկյան, անգլիական  համալսարաններում սովորելով՝ չի նշանակում, որ նրանք բոլորն արտակարգ ընդունակությունների տեր մարդիկ են: Մարդիկ են, գնում են, վճարում են, ստանում են որոշակի կրեդիտներ հավաքելու հնարավորություն  մեկ, չորս, տաս տարում: Ոչ ոք նրանց չի արգելում: Դուք այսօր կարող եք տեսնել Քեմբրիջում սովորող հայ  շատ ուսանողներ, որոնց առաջադիմությունը, մեղմ ասած, բոլորովին էլ բարձր չէ: Այնպես որ տարկետում տալ նրանց միայն նրա համար, որ նրանք առաջնակարգ համալսարանում է սովորում, կարծում եմ, արդարության զգացում չի ամրապնդում մեզ մոտ»,- նշեց ԵՊՀ ռեկտորը:

Արամ Սիմոնյանի բարձրաձյանած մյուս խնդիրը վերաբերում էր զեղչային համակարգին:

«Բուհերը չափազանց ծանր բեռի տակ են կապված զեղչերի հետ: Մենք համաձայն ենք ու չենք վիճարկում, որ զեղչերն առաջին հերթին պետք է վերաբերվեն ծառայած կամ ծառայող ուսանողներին: Բայց այդ զեղչերի մյուս մասը՝ կառավարության որոշմամբ կամ օրենքի ուժ ստացած,  մեզ համար ծանր բեռ է: Մենք խնդրում ենք, որպեսզի հստակեցվի պաշտպանության նախարարության վերաբերմունքը զեղչերի հարցում,  երկրորդ՝ խնդրում եմ այս հարցում առաջնայնությունը տրվի ծառայած ուսանողներին, նոր հետո միայն սոցիալական այս կամ այն խմբին պատկանող ուսանողներին, որովհետև բուհերը չեն կարող իրենց վրա վերցնել սոցապ  նախարարության ֆունկցիաները: Սա մեր ֆունկցիան չէ: Մենք համաձայն ենք, որ պարտադիր է մեզ համար ծառայած ուսանողների զեղչերի խնդիրը, բայց մնացածն արդեն լրացուցիչ բեռ է մեզ վրա:  Խնդրում ենք, որ  այս հարցում հստակ առանձնացվի պաշտպանւթյան նախարարության կողմից  այդ սահմանված զեղչերը»,- ասաց Արամ Սիմոնյանը: