Ձեր վստահելի աղբյուրը

Պաշտպանության ոլորտում առաջարկվող կարգավորումներով հստակեցվում է ծառայության անցման կարգը, ժամկետային և սպայական կազմի պարտադիր ծառայության հետ կապված հարաբերությունները սահմանվում են օրենքի մակարդակով: Ազգային ժողովի պաշտպանության և  անվտանգության հարցերի մշտական հանձնաժողովի նախաձեռնությամբ «Զինապարտության և զինվորական ծառայության մասին օրենսդրական նոր կարգավորումների վերաբերյալ» թեմայով խորհրդարանական լսումների ժամանակ ասաց ՀՀ պաշտպանության նախարար Վիգեն Սարգսյանը:

Նա նշեց, որ գործող օրենսդրությամբ նախատեսված տարածքային սահմանափակումները հանվում են. «Գիտեք, որ հիմա քաղաքացին չի կարող վիճակահանության ժամանակ քաշել այնպիսի զորամաս, որը գտնվում է իր բնակության վայրից 150 կիլոմետր մոտ շառավիղով: Բացարձակ անիմաստ կարգավորում է, որովհետև եթե դա վիճակահանություն է, ապա պետք է յուրաքանչյուր  քաղաքացի հավասար հնարավորություն ունենա տեսնելու, թե իր վիճակահանությամբ որ զորամաս է  նախանշվելու:

Մենք նաև  կարգավորել ենք արտոնությունների խնդիրը: Այսօր արտոնությունները, որոնք մենք տալիս ենք՝ ընտանեկան վիճակից ելնելով կամ այլ արտոնություններ,  կապված են ծառայության վայրի  մոտիկության հետ: Ենթադրենք, Տավուշում  արտոնությունից օգտվող քաղաքացին լրիվ օրենքի շրջանակներում կարող է  հայտնվել  առաջնագծում մարտական  հերթապահություն իրականացնելիս, որովհետև իր տունը գտնվում է մարտական հերթապահության վայրից, ասենք, 60 կմ հեռու: Մենք կարծում ենք, որ դա ձևական բնույթ է հաղորդում այդ արտոնություններին՝ փոքր տարածքով հանրապետության  պարագայում որևէ խնդիր չլուծելով, ընդամենը ձևական  պատրանք  է ստեղծում, որ մենք ինչ-որ արտոնություն ենք տալիս:

Մենք առաջարկում ենք տարածքային արտոնությունը փոխարինել բովանդակային արտոնությամբ, այսինքն մարտական հերթապահության մեջ այս արտոնություններից օգտվող քաղաքացին կարող է ընդգրկվել միայն կամավոր հիմունքներով: Որպեսզի չլինի այն մտավախությունը, որ զորամասում քաղաքացուն պարտադրելու են, որ գրի՝ կամավոր  ուզում է ընդգրկվել, սա վերագրվում է միայն «Ես եմ» ծրագիրն ընտրող քաղաքացուն: Այսինքն եթե ունի արտոնություն, բայց ուզում է «Ես եմ» ծրագրով մասնակցի զորակոչին, կարող է ասել, որ  չի ուզում  օգտվել արտոնություններից, ուզում է ծառայությունն անցկացնել առաջնագծում»:

Նախարարը տեղեկացրեց, որ ծառայության ընթացքում արտոնությունից օգտվող քաղաքացուն մեկ արձակուրդի տեղը երեք պարտադիր արձակուրդ է տրվում՝  վեց ամիսը մեկ անգամ, մեկը 10 օր, երկուսը՝ 5-ական օր. «Ինչո՞ւ ենք սա արել: Արտոնության հիմնավոումների մեջ ուժեղ է սոցիալական բաղադրիչը: Ասում էին՝ արտոնությունը նրա համար է, որ ծնողը մոտիկ գտնվող  զորամաս հեշտ այցելի:  Փաստորեն, այսպես քաղաքացին հնարավորություն է ունենում երեք անգամ գնալ արձակուրդ»:

Վիգեն Սարգսյանը նաև ասաց, որ ծնողների՝ զորամասեր այցելությունների ծրագրերը մշտապես իրենց ուշադրության կենտրոնում է,  գնալով շատանալու են:

Նախարարը նաև հայտնեց, որ ընդլայնվել է Զինված ուժերում եղբայրների ծառայության կարգը. «Մինչ այսօր եթե նույն զորակոչին երկու եղբայր զորակոչվում են Զինված ուժեր, նրանցից մեկը կարող էր մասնակցել վիճակահանությանը, մյուսը կարող էր  նույն զորամաս մեկնել ծառայության: Դա  չէր տարածվում տարբեր զորակոչների  ընթացքում  զորակոչվող եղբայրների վրա: Այս օրենքի նախագծով փոխում ենք այդ կարգավորումը: Եթե ավագ եղբոր ծառայությունը 17 ամիսը չի գերազանցում, ցանկացած պահի կարող է կրտսեր եղբայրը գնալ նույն զորամաս ծառայելու»: