Ձեր վստահելի աղբյուրը

«Պաշտպանության մասին», «Զինվորական ծառայության» մասին օրենքների առաջարկումը երեք հիմնական նպատակ է հետապնդում: Ազգային ժողովի պաշտպանության և  անվտանգության հարցերի մշտական հանձնաժողովի նախաձեռնությամբ «Զինապարտության և զինվորական ծառայության մասին օրենսդրական նոր կարգավորումների վերաբերյալ» թեմայով խորհրդարանական լսումների ժամանակ ասաց ՀՀ պաշտպանության նախարար Վիգեն Սարգսյանը:

Նախարարի ներկայացմամբ, այս օրենքների ընդունումը  պայմանավորված է սահմանադրական բարեփոխումներով, քանի որ արված փոփոխությունները  կարիք ունեն կարգավորման օրենսդրական մակարդակում:

Երկրորդ նպատակը, Վ. Սարգսյանի խոսքով, կոնսոլիդացումն է: Նա նշեց, որ տարիների ընթացքում պաշտպանության ոլորտում ընդունվել են բազմաթիվ օրենսդրական ակտեր, որոնք հաճախ ունենում են համադիր ընթերցում, կիրառում, նույն խնդրին վերաբերող կարգավորումներ տարբեր օրենսդրական ակտերում՝ երբեմն իրար հետ որոշակի հակասության մեջ գտնվելով:

«Օրենսդրական դաշտն ի մի բերելու կարիք կար»,- նշեց նա:

Երրորդ նպատակը նոր քաղաքականության, «Պատիվ ունեմ», «Ես եմ»  ծրագրերի համար  իրավական հիմքի ստեղծումն է:

«Երկու ծրագիրն էլ, ինչպես նաև բազմաթիվ այլ քաղաքականությունների փոփոխություններ, կարիք ունեն  իրավական ձևակերպման օրենքի մակարդակում»,- ասաց Վիգեն Սարգսյանը:

Նախարարը տեղեկացրեց, որ այս օրենքների նախագծերը վերջին վեց ամիսներին հանրային քննարկումների առարկա էին դարձել: