Ձեր վստահելի աղբյուրը

Այսօր Եվրոպայի խորհրդի խորհրդարանական վեհաժողովը քննարկում է Ադրբեջանի վերաբերյալ 2 զեկույցները՝ ժողովրդավարական ինստիտուտների գործունեության, որը ներկայացնում են Ստեֆան Շենախն ու Սեզար Ֆլորին Պրեդան,  ու մարդու իրավունքների հարգման վերաբերյալ զեկույցը, որը պատրաստել է բելգիացի Ալան Դեստեքսը, ով, սակայն, այլևս ԵԽԽՎ անդամ չէ, քանի որ ադրբեջանական կոռուպցիոն սկանդալի պատճառով նախընտրեց հրաժարվել ԵԽԽՎ-ից՝ բացատրություններից խուսափելու համար։ 

Դեստեքսի փոխարեն զեկույցը ներկայացրեց ԵԽԽՎ իրավական հարցերով հանձնաժողովի նորընտիր նախագահ Լենա Սոտնիկը, ով նշեց, որ  Դեստեքսը հրաժարական տվեց ԵԽԽՎ-ից՝ The Guardian-ի կողմից հրապարակված հետաքննությունից հետո, երբ պարզվեց, որ նա կապ է ունեցել Ադրբեջանի հետ ու գումարներ ստացել։ Նշեց, որ զեկույցը նախապատրաստվել է բանաձևի առաջարկության հիման վրա, որը մտահոգություն էր հայտնում Ադրբեջանում մարդու իրավունքների պաշտպանների նկատմամբ ճնշումների վերաբերյալ, այն ժամանակ երբ Ադրբեջանը նախագահում էր ԵԽ նախարարների կոմիտեում։ Նշվեց, որ քաղաքական բանտարկյալների հետ կապված Դեստեքսը կոնկրետ թվեր չի նշել։ Իրավական հարցերի հանձնաժողովը մտահոգություն է հայտնել մարդու իրավունքների խախտումների աճի վերաբերյալ ու կոչ արել իշխանություններին հետաքննություն անցկացնել ու ստեղծել ՀԿ-ների ու իրավապաշտպանների գործունեության համար պայմաններ։ Սոտնիկը կոչ արեց Ադրբեջանին իրականացնել ՄԻԵԴ որոշումն ու անհապաղ ազատ արձակել բանտարկված Իլգար Մամմադովին, որի պատճառով ԵԽ նախարարների կոմիտեն Ադրբեջանի նկատմամբ աննախադեպ որոշում է կայացրել, որը կարող է հանգեցնել մինչև անդամակցությունից զրկելը։

Զեկույցների ներկայացումից հետո ելույթներով ու Ադրբեջանին ուղղված քննադատություններով հանդես եկան ԵԽԽՎ անդամները՝ կոչ անելով առավել խստացնել զեկույցը, նշելով, որ Ադրբեջանը պետք է ազատ արձակի բոլոր քաղաքական բանտարկյալներին  ու իշխանությունները պետք է հետաքննություն անցկացնեն կոռուպցիայի պնդումների հետ կապված։

Պատգամավոր Պիտեր Օմցիգն իր ելույթում նշեց, որ հպարտ չեն Ադրբեջանով։ «Ես կասեի այս զեկույցը ոչ թե ժողովրդավարության հաստատությունների գործունեության, այլ ոչ գործունեության մասին է։ Երկրում առկա են քաղբանտարկյալներ, բացահայտվեց «ադրբեջանական լվացքատունը», Իլգար Մամադովը բանտում է»,-ասաց Օմցիգն ու հարց ուղղեց Ադրբեջանի ներկայացուցիչներին, թե ինչ են մտածում լվացքատան հետաքննության մասին, արդյո՞ք կհամագործակցեն, թե կրկին կմեղադրեն միայն Եվրոպային ու կոչ արեց Սուլեյմանովին՝ «օգտագործել շանսն ու ասել, թե ինչ էր անում Վոլոնտեի հետ»։

Օմցիգին պատասխանեց ադրբեջանցի Սամադ Սեիդովն ու ասաց, թե բավական է Օմցիգն իրեն ներկայացնի որպես ժողովրդավարության պաշտպանի ու իրենք գիտեն, թե ովքեր են իրենց հետևում կանգնած ու գիտեն Հայաստանից իրեն աջակցողների մասին։

Սեիդովին կտրուկ պատասխան տվեց զեկուցող Սոտնիկն, ասելով․«Պարոն Օմցիգի հարցը շատ հստակ էր ու վերաբերում էր կոռուպցիայի պնդումներին ու ճիշտ չէ չպատասխանել, այլ փոխարենը մեղադրել։ Ես ուզում եմ պատասխանել կոմիտեի անունից, թե ով է մեր հետևում։ Մեր ետևում Մարդու իրավունքների եվրոպական կոնվենցիան է, օրենքի գերակայության արժեքն ու հիմնական ազատությունների հարգումը»։

Զեկույցների  քվեարկությունը ԵԽԽՎ-ում տեղի կունենա րոպեներ անց։

Նյութը պատրաստեց՝ Աննա Մկրտչյանը