Ձեր վստահելի աղբյուրը

Հոկտեմբերի 12-ին ապրիլյան պատերազմի ժամանակ Ջրականում (Ջաբրայիլ) զոհված զինծառայող, տանկիստ Վահե Զաքարյանը կդառնար 22  տարեկան:

«Կիրթ, դաստիարակված, համեստ, բարի, ընկերասեր»,- այսպես են մերօրյա հերոս Վահե Զաքարյանին բնութագրում հարազատները:

Հայրը՝ Սամվել Զաքարյանը հարցազրույցներից մեկում պատմել է, որ որդին չափից դուրս ազնիվ էր և երբեք նեղություն չի տվել իրենց:

Վահեն ծնվել էր 1995 թվականի հոկտեմբերի 12-ին Կոտայքի մարզի Հրազդան քաղաքում:  Տան միակ արու զավակն էր, ուներ երկու քույր: Սովորել է Հրազդանում, երբ ընտանիքով տեղափոխվել են Ռուսաստանի Դաշնություն, ութ ամիս հետո Վահեն որոշել է վերադառնալ Հայաստան և քույրերի հետ մնացել  է Հրազդանում: Դպրոցն ավարտելուց հետո ընդունվել է Ֆիզիկական կուլտուրայի և սպորտի պետական ինստիտուտ, նույն տարում էլ զորակոչվել է բանակ:

Փոքր տարիքից զբաղվել է սպորտով՝ կարատեով և արևելյան մարտարվեստով։ Բազում հաղթանակներ և մեդալներ ունի, բազմաթիվ միջազգային մրցույթների հաղթող է։ Հայաստանում մասնակցել է բազմաթիվ մրցույթների։ Հայաստանի հանրապետության երկակի չեմպիոն է, ունի երկու սև գոտի։

Վահեն 2014 թվականին զորակոչվել է Հայոց բանակ, 6 ամիս ծառայել է Հոկտեմբերյանում և և ուսումնական փուլն անցնելուց հետո, որպես տանկի նշանառու-օպերատոր, տեղափոխվել է ԼՂՀ՝ Ջաբրայիլ։ Ծնողների խոսքերով՝ Վահեն մեծ ոգևորությամբ է բանակ գնացել, ծառայությունը շատ լավ է անցել, երբեք չի բողոքել: 

2016 թվականի ապրիլի 2-ին ծնողները խոսել են Վահեի հետ, ասել է, որ պալիգոններ են գնում, ամեն ինչ նորմալ է, հետո կզանգի: Դրանից հետո զանգ չեն ստացել, լուրերով իմանում են Արցախում տիրող լարված իրավիճակի մասին ու սկսում են փնտրել որդուն: Նրա զոհվելուց հետո են ծնողներն իմանում որդու և տանկի անձնակազմի սխրագործության մասին: Տանկիստ Վահեն զոհվել է մարտի դաշտում, նրա հետ նույն տանկում եղել են Հայկ Գրիգորյանը և Նորայր Գասպարյանը: Ապրիլի 2-ին հակառակորդի առաջխաղացումը կասեցնելու նպատակով` տանկի անձնակազմը մի քանի անգամ զորաշարժ է կատարել ու խոցել գրոհող թշնամուն` պատճառելով նրան կենդանի ուժի զգալի կորուստներ: Տանկի անձնակազմը զոհվել է մարտի դաշտում՝ թշնամու կողմից արձակված անօդաչու թռչող սարքի հարվածից: 

Վահեն ու Նորայրը մտերիմ ընկերներ են եղել, միասին կռվել են հակառակորդի դեմ ու միասին էլ զոհվել են: Նրանց տունդարձին մնացել էր երկու ամիս:

Վահե Զաքարյանը հետմահու Հայաստանի և Արցախի նախագահների կողմից պարգևատրվել է «Արիության» և «Հայրենիքին մատուցած ծառայությունների համար» մեդալներով։

Վահե Զաքարյանն ու Նորայր Գասպարյանը: