Ձեր վստահելի աղբյուրը

Հոկտեմբերի 14-ին՝ ապրիլյան պատերազմի անմահ հերոս, տանկիստ  Տիգրան  Աբգարյանի ծննդյան օրը, Գյումրիում տեղի ունեցան  մի շարք միջոցառումներ: Դրանցից խորհրդանշականը այն էր, որ Տիգրանի պապի տնկած ընկուզենին թափ տվեցին, որպեսզի պտուղները հասնեն բոլորին:

Հարազատների խոսքերով՝ Տիգրանի ծնունդը ամեն անգամ նշել են ընկուզենին թափ տալով ու պտուղները հավաքելով։ Այդ ավանդույթի հիմքը Տիգրանի պապիկն է դրել: «Պապն ասում էր՝ հենց ծնունդդ գա, թափ կտանք, ու Տիգրանի մոտ տպավորվել էր, որ հոկտեմբերի 14-ը ընկուզենու թափ տալու օրն է»,- ասում է Տիգրանի եղբայրը՝ Ժորա Աբգարյանը:

Աբգարյաններն այդ ավանդույթը այսօր էլ պահում են և շարունակելու են պահել:

Գյումրեցիներն ապրիլյան պատերազմի հերոսի ծննդյան օրն այցելեցին Պանթեոն, ծաղիկներ դրեցին ու գլուխ խոնարհեցին ապրիլյանում զոհված  գյումրեցի  հայորդիների  շիրիմներին։
Տիգրանենց տան բակում էլ, որտեղ նրա հիշատակը հավերժացնող հուշահամալիր է կառուցված, դպրոցականները վառվող մոմեր ու ծաղիկներ դրեցին։

Տանկիստին նվիրված միջոցառումներին մասնակցում էր նաև հերոսի անունը կրող փոքրիկ Տիգրանը, որը ծնվել է 2016 թվականի ապրիլի 10-ին: Ի պատիվ գյումրեցի հերոսի՝ փոքրիկի  անունը Տիգրան են դրել: Այսօր Տիգրանների ընտանիքները բարեկամական ջերմ հարաբերությունների մեջ են: Տիգրան Աբգարյանին նվիրված ցանկացած միջոցառմանը մասնակցում է նաև փորքիկ Տիգրանը: