Ձեր վստահելի աղբյուրը

ԵԱՀԿ պաշտոնական կայքի փոխանցմամբ,  ԵԱՀԿ Մինսկի խմբի համանախագահները և Հայաստանի ու Ադրբեջանի արտաքին գործերի նախարարները Ժնևում այսօր կայացած Հայաստանի և Ադրբեջանի նախագահների հանդիպման արդյունքներով համատեղ հայտարարությամբ են հանդես եկել:

Հայտարարության մեջ մասնավորապես ասված է.

«Հայաստանի Հանրապետության  նախագահ Սերժ Սարգսյանը և Ադրբեջանի նախագահ Իլհամ Ալիևը այսօր հանդիպում են ունեցել Շվեյցարիայում, Ժնև քաղաքում: Արտաքին գործերի նախարարներ Էդվարդ Նալբանդյանը և Էլմար Մամեդյարովը նույնպես մասնակցել են հանդիպմանը, որը կազմակերպվել էր ԵԱՀԿ Մինսկի խմբի համանախագահների (Իգոր Պոպով, ՌԴ, Ստեփան Վիսկոնտի, Ֆրանսիա և Էնդրյու Շոֆեր, ԱՄՆ)  հովանու ներքո: ԵԱՀԿ գործող նախագահի անձնական ներկայացուցիչ Անջեյ Կասպրշիկը ևս մասնակցել է գագաթաժողովին:

Հանդիպումն անցել է կառուցողական մթնոլորտում:

Նախագահները համաձայնել են միջոցներ ձեռնարկել բանակցային գործընթացն առաջ մղելու և հավելյալ քայլեր կատարել՝ շփման գծում լարվածությունը նվազեցնելու նպատակով:

Համանախագահները գոհունակություն են հայտնել երկար դադարից հետո կայացած ուղղակի բանակցությունների առթիվ: Նրանք պատրաստակամ են կողմերի հետ շարունակել միջնորդական աշխատանքը Լեռնային Ղարաբաղի հակամարտության խաղաղ բանակցային կարգավորման ուղղությամբ: Որպես հաջորդ քայլ՝ համանախագահները մոտ ապագայում աշխատանքային քննարկումներ կանցկացնեն նախարարների հետ»: