Ձեր վստահելի աղբյուրը

ՀՀ ազգային ժողովի «Ծառուկյան» խմբակցության պատգամավոր Միքայել Մելքումյանը Կառավարությանը կոչ է անում քաղաքական կամք դրսևորել և տարբեր հարթակներում շարունակել քննարկումներն ընտանեկան բռնության դեմ օրենքի նոր նախագծի վերաբերյալ: Պատգամավորն այս մասին հայտարարեց «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքի նախագծի խորհրդարանական լսումների շրջանակում:

«Ցանկացած բռնություն՝ լինի դա Հայաստանում, թե այլուր, պետք է դատապարտենք. չի կարող լինել բռնություն, որի համար կարող ենք ասել, որ այո տվյալ պահի համար դա ճիշտ է: Ոչ, այդպիսի բան չկա: Բոլոր կարծիքներն, իհարկե, պետք է հարգել, սակայն որտեղից է գալիս օրենքի դեմ կարծիք ունենալն ու հայտնելը. նրանից, որ օրենքի կենսունակությունը հարցականի տակ է...և ոչ միայն այս օրենքի, այլև շատ ու շատ այլ օրենքների»,-նշեց նա:

Պատգամավորի դիտարկմամբ՝ սա բավականին զգայուն օրենք է, որովհետև այն բոլորին է վերաբերում:

«Հայ իրականության մեջ ընտանիքը միակ բջիջն է, որտեղ ընդունված չի եղել, որ ծնողը կամ զավակը գնա, գործ տա մյուսի նկատմամբ: Այսինքն՝ մենք շատ ճիշտ հոգեբանական գնահատականներ պետք տանք սրան, բայց այն, որ բոլորը դեմ են բռնությանը, փաստ է, իսկ օրենքի դեմ լինելը գալիս է նրանից, որ վստահություն չկա, թե ինչպես է իրականացվելու դրա վարչարարությունը:

Օրենքը կենսունակ է այն դեպքում, եթե դրա պրակտիկ իրականացման, վարչարարություն անելու օբյեկտիվ և պրակտիկ պայմաններ կան»,-ընդգծեց ԱԺ պատգամավորը՝ հավելելով, որ նախևառաջ պետք է ունենալ վերջին տարիներին գրանցված ընտանեկան բռնության դեպքերի ճշգրիտ վիճակագրությունը, իմանալ՝ արդյոք նվազել են, թե աճել և ինչ գործոններ են ազդեցություն ունեցել: