Ապտակը բռնության դրսևորում չԷ. Վիգեն Քոչարյան

Իրավունք 14:03 17/10/2017 Հայաստան

Ապտակը բռնության դրսևորում չԷ. Վիգեն Քոչարյան

ԱԺ-ում «Ընտանեկան բռնության կանխարգելման մասին » օրենքի վերաբերյալ հանրային լսումների ժամանակ Արդարադատության փոխնախարար Վիգեն Քոչարյանին խնդրեցին մեկնաբանել` կա՞ չափանիշ, թե ինչպես ընկալել` ո՞րն է տնտեսական և ո՞րը հոգեբանական բռնության դրսևում:

Վերջինս ի պատասխան նկատեց, թե իրենց համոզմամբ բավական որոշակիության աստիճան գոյություն ունի:

Վիգեն Քոչարյանը շեշտեց, որ դաստիարակչական ներազդեցությունները, այդ թվում ապտակը, չեն կարող դիտարկվել որպես բռնության դրսևորում:

«Հոգեբանական բռնության դրսևումները բոլորն էլ առաձին-առաձին իրավակարգավորման շրջանակներում հստակեցված են, որոշ մարդիկ ասում են, թե երեխային ապտակելը ևս կարող է դիտարկվել հոգեբանական բռնություն, բայց դրանք մեր իրավական շրջանակներում մեկնաբանված և լուծված են: Օրինակ սպառնալիքի առումով ունենք քրեական օրենսդրության մեջ կարգավորումներ: Երբ խոսում ենք օրենսդրական կարգավորումներից, կիրառման ու մեկնաբանման մասին, չպետք է ելնել ինչ-ինչ անհեթերությունների կանխավարկածից»,-ասաց նա:

Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանն իր հերթին Վիգեն Քոչարյանին հիշեցրեց՝ Հայաստանում գործում է «Աստծո զավակներ» կրոնական կազմակերպությունը, որի հիմքում դրված է ինցեստի հասկացությունը: Նա հետաքրքրվեց՝ կոնկրետ դեպքում ինչպե՞ս է կիրառվելու«Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքը:

Փոխնախարարը նշեց, որ բանախոսը ճիշտ կանի իր հարցադրումներն ուղղի քննարկմանը ներկա ՀՀ ոստիկանության քրեական հետախուզության գլխավոր վարչության 3-րդ վարչության պետ, ոստիկանության գնդապետ Նելլի Դուրյանին: «Եթե ունեք նման հանցագործությունների մասին փաստեր, դիմեք նրան… Ուրիշ բան ավելացնելու չունեմ»,- ասաց Քոչարյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: