Ձեր վստահելի աղբյուրը

Հայ գործարար, բարերար Լևոն Հայրապետյանի փաստաբան Դավիդ Խեչանը հայտարարել է, որ իր պաշտպանյալի հարազատները չեն համաձայնել հետմահու դադարեցնել Բաշկիրիայի վառելիքաէներգետիկ համալիրի բաժնետոմսերը յուրացնելու մեղադրանքով նրա դեմ հարուցված քրեական գործը:

«Նրա մահվան փաստով գործի դադարեցման մասին խոսք լինել չի կարող»,-«Ռիա Նովոստի» գործակալության փոխանցմամբ, ասել է փաստաբանը:

Դ. Խեչանը հիշեցրել է, որ Հայրապետյանը մեղադրվում էր Բաշնեֆթի և Բաշկիրիայի վառելիքաէներգետիկ համալիրի բաժնետոմսերը յուրացնելու համար:

«Եվ ես, և հարազատները հակված են, որ գործը մինչև վերջ ընթանա»,-ասել է փաստաբանը:

Նա նշել է, որ Հայրապետյանը, հայկական ավանդույթի համաձայն, կհուղարկավորվի մահից երեք օր անց: Մահացածի մարմինը կհանձնվի հարազատներին:

«Փաստացի նրան սպանել են»,-ասել է փաստաբանը, Հայրապետյանին կալանավորելու և անազատության մեջ պահելու որոշումը համարելով անօրինական:

Դ. Խեչանը նշել է, որ Լևոն Հայրապետյանը որևէ հոդվածով իրեն մեղավոր չի ճանաչել: