Ձեր վստահելի աղբյուրը

Անցած ամսվա ընթացքում Հայաստանում բենզինի գները բարձրացել են 20 դրամով, բարձրացումը կազմել է 5-6 տոկոս: Ազգային ժողովի տնտեսական հարցերի մշտական հանձնաժողովի նիստում ներկայացնելով Տնտեսական մրցակցության պաշտպանության պետական հանձնաժողովի 2018 թ. տարեկան գործունեության ծրագիրը՝ ասաց հանձնաժողովի նախագահ Արտակ Շաբոյանը:

Նա տեղեկացրեց, որ տարվա սկզբից  մինչև հիմա 90 հազար տոննա բենզին է ներկրվել  Հայաստան:  Բենզինի ներկրումն իրականացնում է երեք տարբեր ընկերություն՝ «Ֆլեշ», CPS, «Մաքս պետրոլ»: Ներկրում իրականացվում է երեք երկրից՝ Ռուսաստան, Բուլղարիա, Թուրքմենստան: Ներկրող ամենախոշոր ընկերությունը շուկայում CPS-ն է:

«Մենք ուսումնասիրել ենք այս ընկերությունների ձեռքբերման փաստաթղթերը, թե ինչ գնով են բենզինը ներկրում, շուրջ 5-6 տոկոսով բարձրացել է բենզինի ձեռքբերման գները»,- ասաց Ա. Շաբոյանը:

Նա տեղեկացրեց, որ ուսումնասիրել են նաև Վրաստանի և Ռուսաստանի գները. «Քանի որ հիմնական մատակարարը Ռուսաստանն է, այնտեղ այս ժամանակահատվածում նույնպես բարձրացել են գները:

«Վրաստանում վերջին երկու ամսում բենզինի գները բարձրացել են 7 տոկոսով: Եթե համապատասխան փոխարժեքով  հաշվարկում ենք, ներկա պահին Վրաստանում բենզինի վաճառքի գինը կազմում է 404 դրամ, Հայաստանում՝420 դրամ: Բնականաբար, այստեղ պետք է հաշվի առնել տրանսպորտային ծախսերը, քանի որ բենզինն ամբողջությամբ ներկրվում է Վրաստանի տարածքով, երկաթգծով, տրանսպատային էական ծախսեր են կատարվում»,- ասաց Ա. Շաբոյանը: