Ձեր վստահելի աղբյուրը

Սարգսյան-Ալիև վերջին հանդիպումը փոխկապակցված էր Արևելյան գործընկերության գագաթնաժողովի հետ: Ադրբեջանը որոշ աջակիցների օգնությամբ այնտեղ փորձում է ամրագրել տարածքային ամբողջականության և սահմանների անձեռնմխելիության սկզբունքը: Լրագրողների հետ այսօր կայացած հանդիպման ժամանակ նման տեսակետ հայտնեց Երևանի մամուլի ակումբի նախագահ Բորիս Նավասարդյանը:

«Ադրբեջանի նպատակն է Արևելյան գործընկերության երկրների շարքում լրացուցիչ դաշնակիցներ ձեռք բերել: Ադրբեջանը ցանկանում է որ Մերձդնեստրյան չճանաչված հանրապետությունները, Աբխազիան, Հարավային Օսիան և Արցախը դիտարկվեն նույն համատեքստում: Ուզենք, թե չուզենք այդ համատեքստն ազդում էր ամբողջ գործընթացի վրա: Անցած տարվա ապրիլյան պատերազմից հետո Հայաստանը կարծես հասավ որոշ մարտավարական նպատակների: Մայիս-հունիս ամիսներին նույնիսկ համաձայնություններ ձեռք բերվեցին:

Ադրբեջանը դեմ էր, որ այդ բանակցությունների արդյունքները կյանքի կոչվեն: Հայաստանն իր հերթին մերժում էր հետագա բանակցությունների հնարավորությունը՝ մինչև պայմանավորվածությունները պրակտիկորեն չկիրառվեն»,- նշեց բանախոսը:

Անդրադառնալով Սարգսյան-Ալիև ժնևյան հանդիպմանը՝ Բորիս Նավասարդյանը նկատեց՝ բանակցությունները երկար ժամանակ բոյկոտելը Հայաստանի համար մարտավարական առումով նպատակահարմար չէր, քանի որ դա կարող էր բացասաբար ազդել երկրի վարկանիշի վրա:

«Պարզ էր, որ վաղ թե ուշ ՀՀ նախագահ Սերժ Սարգսյանը պետք է համաձայներ գնալ հանդիպման: Ալիևը նույնպես, քանի որ գտնում է, որ կարելի է վերադառնալ այն օրակարգին, որը ձեռնտու է Ադրբեջանին: Այդ օրակարգը Մադրիդյան սկզբունքներն են: Ինչ վերաբերում է ժնևյան հանդիպմանը, ապա դրա հիմնական նպատակը ընդհանուր լարվածության նվազեցումն էր, ոչ թե կոնկրետ պայմանավորվածություններ ձեռք բերելը: Ադրբեջանական վերջին սկանդալները, կարծում եմ, կարող են հույս ներշնչել, որ այս հանդիպման արդյունքում Հայաստանը որոշակի մարտավարական օգուտ ստացավ»,- ամփոփեց բանախոսը: