Ձեր վստահելի աղբյուրը

««Հին Երևան» նախագիծը միշտ ինչ-որ խոչընդոտների է հանդիպում: Երբ աշխատանքները սկսվեցին, ստորգետնյա ջրեր դուրս եկան, բայց հիմա տեղում ամեն ինչ կարգավորված է դրենաժային ամբողջ ցանցը տեղադրելու, բետոնային աշխատանքները սկսելու համար»,- լրագրողների հետ հանդիպմանն ասաց նախագծի հեղինակ Լևոն Վարդանյանը:

Նա նշեց, որ այժմ աշխատանքներ են իրականացվում Տերյան-Բուզանդ խաչմերուկում, միաժամանակ շարունակվում է նաև նախագծային աշխատանքները: Ճարտարապետի գնահատմամբ, աշխատանքները նորմալ տեմպով ընթանում են, կառավարության հսկողության տակ է:

«Երևի Երևանի կենտրոնում միակ տարածքն է, որտեղ իրացման աշխատանքները շատ դժվար են գնում: Քանի որ բնակելի կառուցապատում չկա, իրացման աշխատանքները մի քիչ դժվար են»,- ասաց Լ. Վարդանյանը՝ հավելելով, որ տարածքի մոտ 75 տոկոսն իրացված է:

Նախագծի հեղինակն ասաց, որ «Հին Երևան» ծրագրի իրականացման համար ոչ մի կառույց չի քանդվել:

«Երբ որ ես այդ ծրագիրն առաջարկել եմ, այդ բոլոր կառույցները եղել են արդեն քանդված: Միակ շենքը, որ  ես սկսել եմ աշխատել այս նախագծի վրա և ապամոնտաժվել է, Աֆրիկյանների եկամտաբեր տունն էր»,- նշեց նա:

Պատասխանելով հարցին, թե ե՞րբ առաջին շենքը պատրաստ կլինի, Լ. Վարդանյանն ասաց, որ այս տարի, համենայնդեպս, երկաթբետոնե կարկասներն արդեն մարդիկ կտեսնեն:

«Կառավարությունը 5 տարի է տվել, բայց ներդրողները ոգևորված են: Եթե այսպես շարունակվի, հնարավոր է 4 տարում էլ վերջացնենք:  Բարձրահարկ շենք չէ, առանձին կտորներ են, եթե տարբեր շինարարական  կազմակերպություններ, բրիգադներ ընդգրկվեն, միաժամանակ սկսեն աշխատանքները, գուցե ավելի շուտ ավարտենք»,- նշեց նախագծի հեղինակը: