Ձեր վստահելի աղբյուրը

Այսօր վերսկսվեց ՊՊԾ գնդի գրավման գործով դատավարությունը՝ դատավոր Արտուշ Գաբրիելյանի ղեկավարությամբ: Նա նիստի մեկնարկին հայտարարեց, որ ամբաստանյալներից Խաչատուր Գիչյանի ինքնազգացողությունը վատացել է, նրա համար դատարան շտապօգնություն է կանչվել:
Հայտարարվեց 15 րոպե ընդմիջում: 

«Հետագա բարդությունից խուսափելու նպատակով խորհուրդ է տրվել հիվանդին տեղափոխել  հիվանդանոց: Բանավոր էլ զրուցեցի շտապօգնության բրիգադի բժշկի հետ, վերջինս ասաց, որ անգամ հինգ րոպե չի կարող լինել դատական նիստի դահլիճում, քանի որ շտապ պետք է տեղափոխեն հիվանդանոց, կարող է նրան շտապ վիրահատություն կատարելու անհրաժեշտություն առաջանալ»,- ընդմիջումից հետո հայտարարեց դատավոր Ա. Գաբրիելյանը:

Հաշվի առնելով հանգամանքը, որ ամբաստանյալ Գիչյանը չի կարող մասնակցել այսօրվա դատական նիստին,  դատարանի որոշմամբ նիստը հետաձգվեց: Հաջորդ դատական նիստը տեղի կունենա հոկտեմբերի 26-ին:

Խ. Գիչյանի փաստաբան Աննա Ջուվանովան նիստից հետո լրագրողներին ասաց, որ այցելել է Խ. Գիչյանին մոտ երկու շաբաթ առաջ, այդ այցի ընթացքում նա որևէ խնդիր չի ունեցել, այդ պահին առողջական նորմալ  վիճակում է եղել:

«Սակայն բոլորս էլ գիտենք, որ նրա մոտ սրտի հետ կապված խնդիրներ կան, երբեմն նա ունենում է նոպաներ: Այդ խնդիրը, փաստորեն, առաջացավ նաև այսօր»,- ասաց փաստաբանը:

Աննա Ջուվանովայի խոսքով, երբեմն նրան «Նուբարաշեն» ՔԿՀ-ից տեղափոխում էին դատապարտյալների հիվանդանոց, երբ վիճակը կայունանում էր, կրկին վերադարձնում էին «Նուբարաշեն» ՔԿՀ:

«Անպայման միջնորդելու եմ խափանման միջոցը փոխելու համար»,- ասաց փաստաբանը:

Մեղադրական եզրակացության համաձայն. «Խաչատուր Գիչյանին մեղադրանք է առաջադրվել այն բանի համար, որ նա կազմակերպված խմբի կազմում ընդգրկված անձանց կողմից 2016թ. հուլսի 17-ին, զենքի օգտագործմամբ, կյանքի և առողջության համար վտանգավոր բռնությամբ, ՀՀ ոստիկանության Երևան քաղաքի վարչության պարեկապահակետային ծառայության գնդի տարածքում գտնվող շենքերը, շինությունները և տրանսպորտի միջոցները զավթելուն, ապա զավթածն ազատելու պայմանով Պետությանը, բարձրաստիճան պաշտոնատար անձանց հրաժարականի, ինչպես նաև Ժիրայր Սեֆիլյանին և մի շարք այլ անձանց ՀՀ ԱՆ Քրեակատարողական հիմնարկներից ազատ արձակելու վերաբերյալ պահանջներ ներկայացնելուն օժանդակելու դիտավորությամբ 16.07.2016թ. նախապես խոստացել, իսկ հաջորդ օրը՝ հուլիսի 17-ին կազմակերպված խմբի անդամներին է տրամադրել իր տիրապետման տակ գտնվող «ԿռԱԶ-256 Բ1» մակնիշի 09 SS 424 հ/հ բեռնատար ավտոմեքենա ՝ օժանդակելով նշված հանցավոր արարքի կատարմանը»։

Հիշեցնենք, որ ՊՊԾ գնդի գրավման գործը բաժանվել է երեք մասի, որոնցիցը մեկը մակագրվել է Էրեբունի և Նուբարաշեն վարչական շրջանների ընդհանուր իրավասության դատարանի դատավոր Մեսրոպ Մակյանին, մի մասը՝  Էրեբունի և Նուբարաշեն վարչական շրջանների ընդհանուր իրավասության դատարանի դատավոր  Արթուր Օհանյանին, մյուս մասի դատավարությունը (Արմեն Լամբարյան, Աշոտ Պետրոսյան, Կարո Եղնուկյան, Խաչատուր Գիչյան, Տիգրան  Սարգսյան,  Հովհաննես  Վարդանյան, Արթուր  Մելքոնյանի Արթուր  Սողոմոնյան, Գառնիկ  Հովակիմյան, Մանվել  Աթոյան, Վարդգես  Գևորգյան) շարունակում  է իրականացնել Արտուշ Գաբրիելյանը: