Ձեր վստահելի աղբյուրը

Հայաստանն ու Լեհաստանը մեծ ներուժ ունեն տնտեսական ոլորտում, ինչի լիարժեք օգտագործման համար հատկապես կարևոր են միջկառավարական հանձնաժողովի աշխատանքները, որի հեթական նիստը նախատեսված է այս տարվա դեկտեմբերին: Երևանում Լեհաստանի արտաքին գործերի նախարար Վիտոլդ Վաշչիկովսկիի հետ կայացած համատեղ ասուլիսում հայտարարեց ՀՀ արտաքին գործերի նախարար Էդվարդ Նալբանդյանը:

Նա նշեց, որ վերջին շրջանում զարգացել է համագործակցությունն ապակենտրոնացված, գիտակրթական, մշակութային բնագավառներում, համագործակցում են միջազգային կառույցերի շրջանակներում:

Է. Նալբանդյանն ասաց, որ այս տարի հայ-լեհական հարաբերություների համար մեծ կարևորություն ունեցող երկու իրադարձություն են նշում՝ դիվանագիտական հարաբերությունների հաստատման 25-ամյակը և Լեհաստանում հայկական համայնքի ձևավորման 650- ամյակը:

Նախարարի ներկայացմամբ, տարվա ընթացքում բազմաթիվ միջոցառումներ են կազմակերպվել նվիրված լեհահայությանը՝ ցուցահանդեսներ, համերգներ, գիտաժողովներ,  Լեհաստանի նախագահը նախագահական պալատում հատուկ ընդունելություն է կազմակերպել այս կապակցությամբ:

«Դիվանագիտական հարաբերությունների հաստատումից ի վեր  բարձրաստիճան փոխայցելությունների, արդյունավետ քաղաքական երկխոսության և ծավալուն իրավապայմանագրային դաշտի ստեղծման միջոցով մեր երկրներին հաջողվեց կայուն հիմք  կառուցել հայ-լեհական հարաբերությունների համապարփակ և  բովանդակալից զարգացման համար թե երկկողմ, թե բազմակողմ մակարդակներում»,- ասաց Է. Նալբանդյանը:

Նա նշեց, որ այս օրերին պաշտոնական այցելությամբ Լեհաստանում է գտնվում ՀՀ ԱԺ նախագահ Արա Բաբլոյանի գլխավորած պատվիրակությունը, որն արդյունավետ հանդիպումներ է ունեցել:

«Երեկ Ազգային ժողովի պատվիրակության ներկայությամբ  Լեհաստանի սենատը բանաձև է ընդունել հայ համայնքի կազմավորման 650-ամյակի կապակցությամբ, որտեղ կարևորվում է  հայերի դերակատարությունը լեհական  պատմության մեջ, և շնորհակալություն հայտնում լեհական մշակույթում  ունեցած ստեղծարար ներդրման համար: Նույն օրը սենատում բացվել է «Հայերը Լեհաստանում» խորագրով ցուցահանդես: Այս ամենն առավել քան խորհրդանշում է հայ-լեհական դարավոր բարեկամությունը»,- ասաց ՀՀ ԱԳ նախարար Էդվարդ Նալբանդյանը: