Ձեր վստահելի աղբյուրը

Ամերիկյան Microsoft տեխնոլոգիական ընկերության հիմնադիր Բիլ Գեյթսը հայտարարել է, որ մտադիր է ամերիկյան դպրոցներում 1.7 մլրդ դոլարի ներդրում անել:  Այս մասին գրում է ՌԻԱ Նովոստին՝ վկայակոչելով Washington Post-ին:

Ըստ աղբյուրի՝  գումարը կտրամադրվի ուսուցման հարցում նոր մոտեցումների զարգացմամբ ու փորձարկմամբ հետաքրքրված դպրոցներին:

«Յուրաքանչյուր ուսանող պետք է հրաշալի պետական կրթություն ու բարձրագույն կրթություն ստանա, որպեսզի շուկայում հաջողության հասնի»,- ասել է Բիլ Գեյթսը:

Նշենք, որ մոլորակի ամենահարուստ մարդը` Բիլ Գեյթսը,  բարեգործության պատճառով կանգնած է իր կարգավիճակը վերջնականապես կորցնելու ռիսկի առաջ: Bloomberg գործակալության գնահատականով՝ Amazon-ի հիմնադիր Ջեֆ Բեզոսը մոտ ժամանակներս լիովին կարող է առաջ անցնել Գեյթսից:

Դա  սկզբունքորեն չէր կարող տեղի ունենալ, եթե Գեյթսը չզբաղվեր բարեգործությամբ։  Ներկա պահին Գեյթսի կարողությունը գնահատվում է 87.5 մլրդ դոլար, Բեզոսինը՝ 85.8 մլրդ դոլար, բայց եթե Գեյթսը ժամանակին չնվիրաբերեր Microsoft-ի բաժնեմասերի մոտ 700 մլն-ը և 2.9 մլրդ դոլարի բարեգործություն չաներ,  նրա կարողությունը կկազմեր 150 մլրդ դոլար։