Ձեր վստահելի աղբյուրը

ՏԻՄ ընտրությունները Ջավախքում այսօր առավոտյան մեկնարկել են առանց խախտումների։ Բոլոր ընտրատեղամասերը բացվել են ժամանակին, ջավախքահայերը բավական ակտիվ մասնակցություն են ցուցաբերում քվեարկությանը։ Panorama.am-ի թղթակցի հետ զրույցում այս մասին տեղեկացրեց Ջավախքի շրջանային ժողովի պատգամավոր Ֆյոդոր Թորոսյանը։

Վերջինիցս հետաքրքրվեցինք՝ արդյոք ընտրություններին մասնակցում են  «Վրացական երազանք» կուսակցության հայազգի թեկնածուներ Էդիկ Բերիկյանը, Կարապետ Ալոյանը և Էդուարդ Էլյազյանը, որոնց «Եվրոպական Վրաստան» կուսակցությունը մեղադրում էր Սահմանադրությունը խախտելու և ընտրություններին հայկական անձնագրերով մասնակցելու փորձի մեջ:

Ֆյոդոր Թորոսյանը տեղեկացրեց, որ վերջիններս անարգել կերպով մասնակցում են ՏԻՄ ըտրություններին, քանի որ փաստաթղթերի հետ կապված խնդիրներ չեն հայտնաբերվել։ Սակայն Վրաստանի արդարադատության նախարարությունը ընտրություններից հետո լրացուցիչ կերպով կստուգի նշված 3 և կասկածելի մի շարք այլ թեկնածուների  փաստաթղթերը։ Օրենքի խախտում հայտնաբերելու դեպքում նրանք, թեկուզև ընտրված քաղաքական գործիչներ, ստիպված կլինեն վայր դնել մանդատները։

«Բայց քանի դեռ Էդիկ Բերիկյանի, Կարապետ Ալոյանի և Էդուարդ Էլյազյանի փաստաթղթերում որևէ խնդիր չի հայտնաբերվել, ոչ ոք չի կարող սահմանափակել նրանց իրավունքը՝ մասնակցելու ՏԻՄ ընտրություններին»,- շեշտեց Ջավախքի շրջանային ժողովի պատգամավորը։

Ֆյոդոր Թորոսյանը նաև տեղեկացրեց, որ ինքն այս ընտրություններին չի առաջադրվել և շրջանային ժողովի առաջին նիստը գումարելուն պես վայր կդնի պատգամավորական մանդատը։