Ձեր վստահելի աղբյուրը

Գյումրիի «Յոթ վերք» եկեղեցում հոկտեմբերի 28-ին կայանալու է ՀՀ ժողովրդական արտիստ Հասմիկ Պապյանի համերգը՝ «Նվիրում» խորագրով:  Համերգին հնչելու է միայն  Կոմիտաս: Հասմիկ Պապյանին նվագակցելու է գերմանաբնակ դաշնակահարուհի Լուսինե Խաչատրյանը:

«Համերգի գաղափարը Հասմիկ Պապյանինն է: Նա բավականին երկար ժամանակ ուզում է Գյումրիի համար համերգային ծրագիր անել ու նվիրել Գյումրին: Նվիրում Գյումրիին, Հասմիկ Պապյանը՝ Գյումրիի համար: Համերգի խորագրի ենթատեքստը հենց այդպիսինն է»,- Panorama.am-ին ասաց համերգի կազմակերպիչ «ԱՐՏ PR» ընկերության տնօրեն Գայանե Դավթյանը:

Նրա փոխանցմամբ, Հասմիկ Պապյանի ցանկությունն էր, որ համերգը լինի այնպիսի տեղում, որ մուտքն ազատ լինի, բոլոր ցանկացողները կարողանան լսել իրեն: Նա նաև ցանկանում էր, որ համերգային ծրագրում միայն Կոմիտաս ընդգրկվի:

«Գտանք, որ միակ ամենահետաքրքիր, ամենահարմար ու ճիշտ տեղը «Յոթ վերք» եկեղեցին է, որի դռները միշտ բաց են, գյումրեցիները սիրում են գալ այդ եկեղեցի»,- նշեց Գ. Դավթյանը:

Նա նաև տեղեկացրեց, որ դաշնակահարուհի Լուսինե Խաչատրյանը հատուկ այս համերգին մասնակցելու համար է գալու Հայաստան՝ նվագակցելու Հասմիկ Պապյանին:

Համերգի կազմակերպիչը նաև նշեց, որ եկեղեցում կտեղադրեն մոտ 100-150 աթոռ, մնացած տարածքը կթողնեն ազատ, որպեսզի հնարավորինս շատ մարդ կարողանա ներկա լինել համերգին: Նախատեսում են նաև դրսում էկրաններ տեղադրել, որ մարդիկ նաև կարողանան դրսից էկրանների միջոցով ունկնդրել  հանրահայտ սոպրանո Հասմիկ Պապյանին: Համերգը տևելու է 50 րոպե: