Ձեր վստահելի աղբյուրը

Նոյեմբերի 5-ին համայնքապետ են ընտրելու Հայաստանի 52 քաղաքաներում ու գյուղերում: Դրանցից շատերում ընդամենը մեկ թեկնածուի են քվեարկելու: Ըստ էության, քաղաքացիները ընտրելու հնարավորություն չեն ունենա, ընտրությունը կլինի քվեարկելու կամ չքվեարկելու միջև:

Բանն այն է, որ Ընտրական օրենսգրքի պահանջով,  մինչև թեկնածուների գրանցումը պետք էառաջադրված լինի երկու թեկնածու: Հետագայում, ինքնբացարկի համար սահմանված ժամկետում նրանք կարող են հրաժարվել հետագա պայքարից: Արդյունքում, շատ համայնքներում՝ մեծ մասամբ քաղաքներում գործող ղեկավարները պայքարում միայնակ են մնացել: Նախկինում եղել են դեպքեր, երբ գործող գյուղապետը «ֆեյք» թեկնածու էր ընտրել դստերը կամ էլ կնոջը, անգամ՝ եղբորը: Այս անգամ  նման դեպքեր դեռ հայտնի չեն:

Այսպես, Արարատի, Արտաշատի մասին արդեն գրել ենք: ՀՀԿ կողմից առաջադրված թեկնածուների մրցակիցներն ինքնաբացակ են հայտնել:

Արագածոտնի մարզի Ապարան քաղաքում գրանցված երկու թեկնածուներից մեկն ինքնաբացարկ է հայտնել: Այստեղ միմյանց դեմ պայքարելու հայտ էին ներկայացրել «Գնթունիք» ՍՊԸ հիմնադիր տնօրեն Կարեն Եղիազարյանն ու նույն ընկերության հաշվապահ Հովհաննես Ալեքսանյանը:

Լոռու մարզի Ստեփանավան քաղաքում գործող քաղաքապետ, ՀՀԿ կողմից առաջադրված Մանվել Ղարաքեշիշյանն է մնացել: Նրա միակ մրցակիցը՝ անկուսակացական, Ուրասարի նախկին գյուղապետ Արտակ Կիրակոսյանն ինքնաբացարկ է հայտնել:

Տաշիրում էլ գործող քաղաքապետ Էդգար Արշակյան է մնացել առանց մրցակցի: Նույն պատկերն է  Ալավերդի քաղաքում, այստեղ ՀՀԿ առաջադրած թեկնածուն մարզպետարանի՝ Կանանց և երեխաների իրավունքների բաժնի պետ Սասուն Խեչումյանն է:

Կոտայքի Բյուրեղավան համայնքում էլ ԲՀԿ-ական գործող քաղաքապետ Հակոբ Բալասանյանն է մնացել միայնակ: Եղվարդում էլ առաջադրված երեք թեկնածուներից մեկը մինչ գրանցումը հետ է վերցրել ներկայացրած փաստաթղթերը, մյուսն ինքնաբացարկ է հայտնել: Արդյունքում գործող քաղաքապետ Նորայր Սարգսյանը, որին առաջադրել է ՀՀԿ-ն, մնացել է պայքարում մենակ:

Չարենցավանում Հակոբ Շահգալդյանն է միայնակ մնացել, Կապանում՝ Աշոտ Հայրապետյանը

Հիշեցնենք, նոյեմբերի 5-ին տեղական ինքնակառավարման մարմինների ընտրություններ տեղի կունենան հանրապետության 69 համայնքներում, որոնցից 3-ում կանցկացվեն համայնքի ղեկավարի արտահերթ ընտրություններ, իսկ 34-ը խոշորացված համայնքներ են:

Նշված համայնքներից 15-ում կայանալու են միայն համայնքի ղեկավարի ընտրություններ (որոնցից 3-ում արտահերթ), 17 համայնքում՝ միայն ավագանու անդամի, իսկ 37 համայնքում միաժամանակ անցկացվելու են համայնքի ղեկավարի և ավագանու անդամի ընտրություններ: