Ձեր վստահելի աղբյուրը

ԱԺ պաշտպանության և անվտանգության հարցերի մշտական հանձնաժողովում «Զինվորական ծառայության և զինծառայողի կարգավիճակի մասին» օրենքի նախագծի քննարկման ժամանակ ՀՀԿ խմբակցության պատգամավոր Ֆելիքս Ցոլակյանը հետաքրքրվեց՝ ինչու է որոշվել բանակի կազմից հանել սպորտվաշտը:

ՀՀ պաշտպանության նախարար Վիգեն Սարգսյանը հայտարարեց, թե սպորտվաշտը մեծ խնդիր էր Զինված ուժերի համար:

«Սպորտվաշտ մի շարք քաղաքացիներ են զորակոչվում, իսկ պետությունը ծախսեր է անում»,- ասաց նախարարը, գնահատելով դա որպես «հսկայական ծախս»:

Մյուս կողմից, հայտնեց նա, այդ զինվորները փաստացի չէին ծառայում, գտնվում էին մարզումների մեջ: 

Նախարարի համոզմամբ՝ սպորտվաշտ պահելն ինքնախաբեություն էր:

«Այդ զինծառայողները զորամասում չէին լինում, դա բացարձակ չարդարացված ծախս է»,-ընդգծեց նա։

Նախարարը նշեց, որ Օլիմպիական կոմիտեի հետ նշված հարցով քննարկում են ունեցել: Կառավարություն առաջարկ է ներկայացվել՝ այն զորակոչիկները, ովքեր օլիմպիական չեմպիոն են դարձել, կամ զբաղեցրել 1-4-րդ տեղերը, 3 տարով տարկետում կստանան, հաջորդ անգամ նորից հաջողություն գրանցելու դեպքում կրկին տարկետում կստանան, հակառակ դեպքում կզորակոչվեն բանակ: