Ձեր վստահելի աղբյուրը

«2017 թվականի երրորդ եռամսյակը հետընտրական ժամանակահատված էր, կարծես թե  հասարակական-քաղաքական լարվածություն գրեթե չէր նկատվում, բայց նույնիսկ այս ժամանակահատվածում տեղի են ունեցել ցավալի իրադարաձություններ  կապված լրագրողների գործունեության խոչընդոտման, նրանց նկատմամբ  ֆիզիկական բռնություն կիրառելու առումով»,- լրագրողների հետ հանդիպմանն ասաց Խոսքի ազատության պաշտպանության կոմիտեի նախագահ Աշոտ Մելիքյանը՝ ներկայացնելով  ԽԱՊԿ 2017թ. երրորդ եռամսյակի (հուլիս-սեպտեմբեր) զեկույցը` Հայաստանում խոսքի ազատության վիճակի և լրագրողների ու ԶԼՄ-ների իրավունքների վերաբերյալ:

Նա նշեց, որ երրորդ եռամսյակի ընթացքում արձանագրվել են լրագրողների նկատմամբ ֆիզիկական բռնությունների 2, տարատեսակ ճնշումների 16, տեղեկություններ ստանալու և տարածելու իրավունքի խախտման 39 դեպքեր։

ԽԱՊԿ նախագահը միաժամանակ հավելեց, որ թեև նախորդ եռամսյակում ավելի շատ էին խախտումները (երկրորդում՝ 72, երրորդում՝ 57) , բայց կան միտումներ, որոնք  մտահոգություն են առաջացնում:

«Եթե ճնշումների թիվը զգալիորեն նվազել է, ապա տեղեկություններ ստանալու և տարածելու իրավունքի խախտումների թիվն ավելացել է: Երկրորդ եռամսյակում ֆիզիկական  բռնությունների թիվը 5-ն էր, երրորդում՝ 2-ը, ճնշումների քանակը 57-ից իջել է 16, բայց տեղեկություններ ստանալու և տարածելու իրավունքի խախտումները մոտ 4 անգամ ավելացել են: Սա, իհարկե, մտահոգիչ երևույթ է,  նշանակում է, որ լրագրողների համար տեղեկություններ հայթայթելն ու տարածելը բավականին լուրջ բարդությունների հետ է կապված»,- ասաց Ա. Մելիքյանը:

Նրա խոսքով, լրագրողների իրավունքների խախտումների քանակը, այնուամեյանիվ, մտահոգիչ է, պատճառն այն է, որ իրավապահ մարմինների գործողությունները, դատարանների վճիռները, որոշումները շատ հաճախ ոչ համարժեք են տեղի ունեցած միջադեպերին: