Ձեր վստահելի աղբյուրը

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվել է Սամվել Բաբայանի և մյուսների գործով դատական նիստը: Այսօր հարցաքննվել են գործով ամբաստանյալներ Սանասար Գաբրիելյանը, Արմեն Պողոսյանը:

Սանասար Գաբրիելյանը հայտարարեց, որ ինքն է նախաձեռնել Իգլա»-ի ձեռքբերումը՝ բանակին նվիրելու համար:

«Հասնում եմ Թալիշ, տեսնում եմ՝ ինչ է կատարվում պոստերում, ուզում եմ օգնել: Ես հրամանատար եմ, գիտեմ, թե ինչի  պակաս կա: Էդ որ ես եմ  առնում, նվեր եմ տալիս,  վատ բան եմ անում: Բանակին որ նվեր ենք անո՞ւմ, վա՞տ ենք անում»,- ասաց Ս. Գաբրիելյանը:

Նախագահող դատավոր Արշակ Վարդանյանի հարցին, թե ավելի ողջամիտ չէր գումարով օգնելը, ամբաստանյալն ասաց. «Չգիտե՞մ, թե ուր է գնում այդ գումարը»:

Հրապարակվեց նաև Արմեն Պողոսյանի նախաքննական ցուցմունքները: Այնուհետև փաստաբանի հարցին, թե ի՞նչ ենթադրության եկաք դատաքննության ժամանակ, նա ասաց. «Սամվել Բաբայանն ընդհանրապես դրա հետ կապ չունի»:

Դատավորի հարցին, թե նոր բան կա՞, որի հիման վրա հակառակ հետևության եկաք, որ Ս. Բաբայանը դրա հետ կապ չունի, Ա. Պողոսյանն ասաց. «Սանասարի ցուցմունքները լսելով՝ հասկացա: Եվ ոչ միայն, նաև ամբողջ դատաքննության ընթացքից»:

Սամվել Բաբայանը ձայնալարերի հետ կապված խնդիր ուներ, նա չհարցաքննվեց: Նիստը կշարունակվի հոկտեմբերի 30-ին:

Հիշեցնենք, որ Սամվել Բաբայանին մեղադրանք է առաջադրվել այն բանի համար, որ նա դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահռթիռային համալիր ձեռք բերելուն, փոխադրելուն և պահելուն, ինչպես նաև փոխարկման արդյունքում ձեռք է բերել հանցավոր ճանապարհով ստացված գույք:

Սանասար Գաբրիելյանին մեղադրանք է առաջադրվել այն բանի համար, որ նա մի խումբ անձանց հետ` նախնական համաձայնությամբ ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահռթիռային համալիր:

Արմեն Պողոսյանին մեղադրանք է առաջադրվել այն բանի համար, որ նա մի խումբ անձանց հետ` նախնական համաձայնությամբ ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահռթիռային համալիր: