Ձեր վստահելի աղբյուրը

«Որևէ փաստաթուղթ չի կարող Հայաստանի տնտեսության վրա էականորեն ազդել կամ չազդել, օգտակար լինել,...   եթե չկա Հայաստանի Հանրապետության իշխանությունների կամքը»,-ասաց տնտեսագետ Վահագն Խաչատրյանը:

Նա մասնակցում էր  «Հայաստան-ԵՄ համաձայնագրի տնտեսկան բաղադրիչը․ նոր հնարավորություներ ու խնդիրներ» թեմայով քննարկմանը:

Խաչատրյանը հույս հայտնեց, որ հրապարակված փաստաթուղթը կստորագրվի և չի դառնա հերթականը, որը որևէ ազդեցություն չի ունենա տնտեսական կյանքի զարգացման վրա:

«Հույս ունեմ, որ այս փաստաթուղթը մեր կյանքում գոնե իրականություն կդառնա, որովհետև ԵՄ-ն՝ հատկապես Արևելյան գործընկերության շրջանակում աշխատանքի ընթացքում մեծ փորձ է ձեռք բերել և ծանոթ է տիրող իրավիճակին»,-ասաց տնտեսագետը:

Խաչատրյանն ընդգծեց, որ եվրոպացիները հենց այնպես ֆինանսական որևէ աջակցություն չեն ցուցաբերի: Դրական արդյունքների համար անհրաժեշտ է, որպեսզի իշխանությունները բարեխղճություն դրսևորեն:

«Իրենք շատ լավ գիտեն, թե Հայաստանում ինչ կոռուպցիոն ռիսկեր կան, թե իշխանություններն ինչպես են կարողանում խոստումներ տալ, հետո չիրականացնել: Ես հույս ունեմ, որ ԵՄ պաշտոնյաները հետևողական կլինեն այս փաստաթղթի իրականացման գործում»,-ասաց նա:

Տնտեսագետն առայժմ չի պատկերացնում, թե ինչպես է լինելու Հայաստան-ԵԱՏՄ և Հայաստան-ԵՄ համագործակցության համատեղելիությունը:

«Օրինակ մի կետ կա, որտեղ ասված է, կողմերը չպետք է խտրականություն կիրառեն ներմուծվող արտադրանքի ու նմանատիպ տեղական արտադրանքի միջև: Այսօր բացեր կան»,-ասաց նա: