Ձեր վստահելի աղբյուրը

«Ես ծանոթացել եմ «մեղադրական եզրակացությանը»: Այդտեղ 500 էջանոց հեքիաթ է, չգիտեմ՝ իրենք կազմելուց առաջ գործն ուսումնասիրել են, թե ոչ, ինչեր են գրել»,- ՊՊԾ գնդի գրավմանը մասնակցած խմբից  11 անդամի դատավարությանն ասաց ամբաստանյալ Արամ Մանուկյանը:

Նա նշեց, որ «մեղադրայալ եզրակացություն կոչեցյալն ընդամենը զակազ է», պատվեր, և որ չեն ընդունում այդ մեղադրական եզրակացությունը:

«Մեղադրական եզրակացության մեջ նշված է, որ ինձ վնասազերծել են, սակայն գրված չէ, թե ինչ գործողություն կատարելու ժամանակ, ինչու 10-րդ օրը, ոչ թե առաջին օրը: Մանրուքներ  կան, որոնք այդքան էլ մանրուք չեն, պետք է խորանալ:

Գրված են զենքերի կոդեր, կրակված փամփուշտների  մասին, ոնց որ գնացել ենք այնտեղ փամփուշտներ կրակելու կամ փամփուշտների տվյալներ տալու:
Էդ ա՞  մեր գործողությունների իմաստը եղել: Գրված չէ, որ պահանջվել է իշխանափոխություն: Առհասարակ ոչինչ գրված չէ»,- ասաց Արամ Մանուկյանը:

Փաստաբան Հարություն Բաղդասարյանն ասաց, որ իրենց վստահորդերին մտահոգում է, որ դատախազությունը՝ մեղադրանքի կողմը, ըստ էության, չի բացահայտել հանցագործությունը ծնող պահանջները, մինչդեռ Քրեադատավարական օրենքը պարտավորեցնում է մեղադրանքը ստորագրող դատախազին անդրադառնալ այդ հարցերին:

«Այս հարցն եմ բարձրացնում՝ դատախազից պարզել, թե արդյո՞ք դատախազությունը  քննարկման առարկա դարձրել է հանցագործությունը ծնող պատճառները, գործողություններ կատարե՞լ է դրանց հետևանքները վերացնելու ուղղությամբ: Սա մեր առայժամ բարձրացրած հարցն է, ոչ թե որպես բացարկի միջնորդություն դատախազին,  այլ հայտարարություն, որի արդյունքում հնարավոր է նաև ներկայացվի միջնորդություն»,- ասաց փաստաբանը: 

Դատավորն ասաց, որ բացարկի միջնորդություն չկա, իսկ պարզաբանումներին կանդրադառնան դատավարության ընթացքում: Այնուհետև ամբաստանյալները մեղադրողնեին բացարկ հայտնելու միջնորդությամբ հանդես եկան:

Ամբաստանյալներից մեկը դիմելով դատավորին՝ ասաց. «Այս դատարանը հայոց դատարանը չէ, զինանշանն ու եռագունը, որ ձեր մեջքի հետևում է, գլխավերևում, ձեր մոտ չպետք է լինեն, այլ լինեն մեզ մոտ, ձեզ մոտ ճիշտ կլինի չիբուրաշկի նկարը կախեք, որովհետև չիբուրաշկի դատարանն է սա»: