Ձեր վստահելի աղբյուրը

Ազգային ժողովն առաջին ընթերցմամբ ընդունելու համար քննարկում է «Պաշտպանության մասին» օրենքի նախագիծը: Հիմնական զեկուցող Վիգեն Սարգսյանը նշեց, որ օրինագիծը մշակման փուլում անցել է լայն հանրային քննարկումներ։

«Քննարկվել է Ազգային անվտանգության խորհրդում, անցել է խորհրդարանական լսումների փուլ։ ԱԺ գլխադասային հանձնաժողովում օրենքը քննարկվել է մանրամասնորեն, քննարկվել և ընդունվել են ԱԺ հանձնաժողովների անդամների առաջարկությունների գերակշիռ մասը։ Մի քանի կետով պայմանավորվածություն է ձեռք բերվել օրենքի առաջին ընթերցմամբ ընդունելուց հետո լրացուցիչ քննարկումներ անցկացնել՝ առաջարկնելը տեղայնացնելու և ներդնելու նպատակով։

Անշուշտ առաջին ընթերցմամբ գործընթացն ավարտելուց հետո մենք բաց կլինենք լրացուցիչ քննարկումների համար, և եթե կլինեն առաջարկություններ, պատրաստ ենք դրանք քննարկել՝ նախագծում տեղայնացնելու համար»,- նշեց նախարարը։

Նա մանրամասնեց, որ այս օրինագիծը երեք հիմնական նպատակ է հետապնդում. «Առաջինը սահմանադրական փոփոխություններից հետո առաջացած նոր իրավահարաբերությունների, իշխանությունների ճյուղերի փոխհարաբերությունների արտացոլումն է օրենսդրական դաշտում այնպես, որ դրանց կիրառումը հնարավոր դառնա մինչև 2018 թ. ապրիլի սկիզբը: Երկրորդը՝ ոլորտը կարգավորող օրենքների կոնսոլիդացումն է, որովհետև տարիների ընթացքում ոլորտը կարգավորող բազմաթիվ օրենքներ են ընդունվել` երբեմն միմյանց հակասող, կրկնող: Այս պարագայում դաշտը վերանայելու անհրաժեշտություն կար: Երրորդը՝  նոր քաղաքականությունների ներդրման համար իրավական հիմքերի ստեղծումն է»:

ԱԺ  «Ելք» խմբակցության պատգամավոր Մանե Թանդիլյանը նախարարին հարց ուղղեց  ռազմական դրություն հայտարարելու ժամանակ կառավարության լիազորությունները վերանայելու վերաբերյալ հանձնաժողովի նիստում արված առաջարկի մասին. «Դուք ասացիք, որ մասնագետների հետ կխորհրդակցեք և կասեք, ինչ եզրակացության եկաք»:

Վիգեն Սարգսյանը պատասխանեց, թե խորհրդակցել են և որոշ առաջարկներ արդեն ներկայացվել են փաթեթում. «Կքննարկենք հարցը մինչև երկրորդ ընթերցում և հանձնաժողովում դեռ քննարկման հնարավորություն կլինի»։

«Ելք»-ի պատգամավոր Նիկոլ Փաշինյանը Զինված ուժերի քաղաքական պրոցեսներից չեզոք լինելու վերաբերյալ հարց հնչեցրեց՝  նշելով, որ եղել են դեպքեր, երբ բանակն ամբողջությամբ ներգրավված է եղել քաղաքական պրոցեսների մեջ։

Նախարարը Փաշինյանի մտահոգություններն ավելորդ համարեց։

«Չեզոքության մասին հոդված կա օրենքում՝ 15.8-ը, որը շատ հստակ ասում է  ԶՈւ-ն չեզոք է քաղաքական խնդիրներում, տալիս է մանրամասն դրա բացվածքը և անհանգստանալու առիթ չկա»։

Փաշինյանն արձագանքեց. «Խնդիրը հենց դրանում է, որ նախկինում էլ սահմանադրության մեջ գրված է եղել ԶՈւ չեզոքության ու զսպվածության մասին, բայց  ունեցել ենք կոնկրետ դեպքեր, երբ զինված ուժերը ամբողջությամբ ներգրավված են եղել քաղաքական պրոցեսների մեջ»։