Ձեր վստահելի աղբյուրը

«Ամբողջ տարվա ընթացքում ոչ միայն Վենետիկում, Հայաստանում, այլև աշխարհի տարբեր հայ համայնքներում կազմակերպվելու են բազմապիսի միջոցառումներ, ձեռնարկներ՝ նշանավորելու այս փառավոր հոբելյանը և փորձելու աշխարհին, պատմությանը ներկայացնել Մխիթարյաննների այն խոշոր ձեռքբերումները, որ նրանք իրականություն են դարձրել 300 տարիների ընթացքում»,- այսօր ՀՀ Գիտությունների ազգային ակադեմիայում «Վենետիկի Մխիթարյան Միաբանություն-300» խորագրով միջազգային երկօրյա գիտաժողովի բացման ժամանակ ողջույնի խոսքում նշեց ՀՀ Սփյուռքի նախարար Հրանուշ Հակոբյանը։

Նրա խոսքով՝ 300 տարի Մխիթարյանները կարողացան կղզին հիմնովին վերափոխել, դարձնել Սուրբ Ղազար կղզի և այնտեղ ստեղծել ոչ միայն հոգևոր, այլև գիտական, կրթական, մշակութային հզոր կենտրոն, որն այսօր լուրջ ուսումնասիրությունների կարիք ունի։

«Այնտեղ կուտակված են գանձերը, Մխիթարյանների թողած գիտական ժառանգությունը՝  թարգմանական գրականությամբ, բառարաններով, ազգագրություններով, լուրջ ուսումնասիրությունների կարիք ունեն և ներկայումս հասու չեն շատ շատերին»,- նշեց նախարարը։

Գիտաժողովին ներկա Վենետիկի Մխիթարյան միաբանության քահանայապետական պատվիրակ, Թուրքիայի Հայ Կաթողիկե եկեղեցու թեմի առաջնորդ Լևոն արքեպիսկոպոս Զեքիյանը լրագրողների հետ զրույցում նշեց, որ այսպիսի գիտաժողովները շատ կարևոր են գնահատելու և արժևորելու Մխիթարյանների գործունեությունը:

«Ուրախ եմ, որ հայրենիքի մեջ կժողովվի նման գիտաժողով։ Վստահ եմ, որ կարծիքների փոխանակությունը, համախմբումը պետք է նպաստի, որ մեկ քայլ ավելի կատարվի, և Մխիթարյան միաբանության գործունեությունն ավելի հստակորեն բանաձևվի, ընկալվի: Ինչպես նաև սա կնպաստի ապագա հեռանկարների մասին քննարկումներ անելուն»,- ասաց նա:

Նաև ընդգծեց Սուրբ Ղազար կղզու՝ հայության համար մեծ նշանակություն ունենալը. «Այն մեծ հարստությունն ու ժառանգությունը, որն ունենք այդ կղզում, դրա պահպանելն արդեն իսկ մեծ առաքելություն է։ Պետք է այնտեղ կուտակված ու ապրող մշակույթը մեր կյանքում ապրող իրականություն դարձնենք»։

Գիտաժողովին մասնակցում էին ՀՀ սփյուռքի նախարարությունը, ԳԱԱ հայագիտական և հասարակական գիտությունների բաժանմունքը, Երևանի պետական համալսարանը, Մեսրոպ Մաշտոցի անվան հին ձեռագրերի ինստիտուտ-մատենադարանը և այլն: Այն կընթանա «Մխիթարյանների գործունեությունը պատմագիտության ասպարեզում», «Մխիթարյանների ավանդը բանասիրության ոլորտում», «Արվեստը և մշակույթը Մխիթարյանների գործունեության մեջ» թեմանտիկ նիստերով։ Զեկուցումներով հանդես կգան գիտական կառույցների ներկայացուցիչներ՝  գիտնականներ, դասախոսներ, մտավորականներ: