Ձեր վստահելի աղբյուրը

Շենգավիթի դատարանում մեկնարկել է ՊՊԾ գնդի գրավմանը մասնակցած խմբից  11 անդամի՝ Արամ Մանուկյանի, Հովհաննես Հարությունյանի, Թաթուլ Թամրազյանի, Արամ Հակոբյանի, Տիգրան Մանուկյանի, Արայիկ Հակոբյանի, Վարդան Գերավետյանի, Մարտիրոս Հակոբյանի, Սերգեյ Կյուրեղյան, Գևորկ Իրիցյանի, Թորոս  Թորոսյանի գործով դատավարությունը: Նախագահող դատավորն է Արթուր Օհանյանը:

Հիշեցնենք, որ երեք շաբաթ առաջ որոշում ընդունվեց ՊՊԾ գնդի գրավման  գործը բաժանել երեք առանձին վարույթների: Այսօր մեկնարկեց այդ երեքից առանձնացված մի վարույթի քննությունը: 

Արթուր Օհանյանը հայտարարեց, որ նախատեսում են Շենգավիթ համայնքի դատարանում ամեն երեքշաբաթի ժամը 11:30-ին դատական նիստեր անցկացնել:

Նիստում նախ ճշտվեց ամբաստանյալների ինքնությունը: 

Դատավորը հետաքրքրվեց ամբաստանյալ Վարդան Գերավետյանից, թե ինչպե՞ս է առողջական վիճակը: Նա պատասխանեց. «Առողջական վիճակս քանի գնում վատանում է, որովհետև պահման պայմանները նույնանման են. դատապարտվածների, այսպես ասած, մի քանի անգամ քրեորեն պատժված մարդկանց հետո նույն պայմաններում ենք գտնվում, թեև ինչպես դուք ասացիք,  կա անմեղության կանխավարկած, մենք կալանավորման մեջ ենք»:

Ամբաստանյալ Մարտիրոս Հակոբյանը ներկայանալուց հետո ասաց, որ իրեն դատարան բերում են շղթայակապված: «Կասկածյալները կամ մեղադրյալները եթե տեղափոխվում են հատուկ նշանակության մեքենաներով, այդ անձանց շղթայակապ չեն ուղեկցում, առավել ևս երբ որ չորս մեքենա ուղեկցում է, մեկն էլ զինված:  Նախորդ դատարանում ոչ մեկ ուշադրության չդարձրեց: Կարծում եմ՝ ձեր մոտ անաչառությունը համեմատաբար մի քիչ ավելի դրական է, քան նախորդ դատավորինը, այդ հարցը ձեր միջոցով կարող ենք բարձրացնել»,- ասաց Մ. Հակոբյանը: