Ձեր վստահելի աղբյուրը

«Ելք» խմբակցության ղեկավար Նիկոլ Փաշինյանն այսօր խորհրդարանում «Զինվորական ծառայության և զինծառայողի կարգավիճակի մասին» օրինագծի քննարկմանը հիմնական զեկուցող, պաշպանության նախարար Վիգեն Սարգսյանից հետաքրքրվեց, թե կարո՞ղ է ասել` առողջական հիմքով պարտադիր զինվորական ծառայությունից ազատված օրինակ 100 անձանցից ո՞ր մասն է կոռուպցիայի բերումով ազատվել:

«Դուք ասում եք եղբայր, եթե օրինակ, դու ուզում ես դառնալ պատմաբան, շատ լավ ես անում, գնա ծառայի, հետո արի գնա պատմաբան դարձի, բայց նաև ուրիշ տեղ ասում ենք, եթե ուզում ես հոգևորական դառնաս, պետք չէ գնաս ծառայես, նոր դառնաս հոգևորական, դու հենց որոշեցիր հոգևորական դառնաս, քեզ տալիս ենք տարկետում, սա ձեր ասած սկզբունքին ուղիղ հակասում է»,-ասաց պատգամավորը:

Պատգամավորն անդրադարձավ մեկ այլ դրույթի՝ նշելով. «Օրինակ քաղաքացին, որն ապրում է ԱՄՆ-ում և մի օր գալիս է պապու գերեզմանին, նրան անմիջապես օդանավակայանում բռնում ու ասում են` դու չես ծառայել, զինապարտ ես։ Էդ մարդուն ասում ենք մինչև չծառայես, հետ չես գնալու»։

Առողջական վիճակի պատճառով զինծառայությունից ազատվածների վերաբերյալ բարձրացված խնդրին Վիգեն Սարգսյանը նշեց, որ այստեղ  շատ լուրջ խնդիրներ կան, բայց կոնկրետ կոռուպցիոն դեպքերի թվեր չներկայացրեց։

«Մենք ունենք այդ խնդիրը և դրա լուծման համար այս օրենքում ձևավորված են իրավական հիմքեր։ Առաջինը առաջնային բուժզննության պատասխանատվության բարձրացման հարցն է։ Մենք ասում ենք, քանի որ պետությունը վճարում է քաղաքացու առողջական վիճակի մշտական զննման համար, մանավանդ մինչև 18 տարեկանը լրանալը պոլիկլինիկաների միջոցով, պոլիկլինիկաներն իրենց վրա պետք է պատասխանատվություն վերցնեն ասելու` տվյալ մարդը սահմանափակում ունի՞, թե՞ ոչ։ Այնուհետև մենք պարտավոր ենք ձևավորել փորձագիտական կարող ուժ վերևի օղակում՝ այդ եզրակացությունները քննելու և փորձագիտական եզրակացություն տալու համար»,-ասաց նախարարը։

Հոգևորականների տարկետման իրավունքի հետ կապված հիմնական զեկուցողն ասաց, որ  բացառություններ չեն լինելու։ «Հոգևորականների հետ կապված ոչինչ չկա օրենքում գրված, հիմա հոգևորականներն ազատվում են հիմնականում Կառավարության որոշմամբ՝ պարզ պատճառով, որովհետև եթե այլ բուհերում տարկետում կա, պատճառ չկա, թե ինչի Գևորգյան ճեմարանում պիտի չլինի։ Ես Վեհափառ Հայրապետի հետ մանրամասն քննարկել եմ հարցը և շարունակելու եմ քննարկել, եթե այլ բուհերում տարկետումը վերանա, ես համարում եմ, որ մասնագիտություն չկա, որ պետք է լինի բացառություն»։

Պաշտպանության նախարարին պահեստազորի հետ կապված հարց ուղղեց ՀՀԿ-ական պատգամավոր Արման Սաղաթելյանը։

«Նախագծով ստեղծվում են աննախադեպ իրավական հիմքեր անցումային միջանկյալ խմբի համար, որը միջանկյալ դեր է ունենալու ուղղակի պահեստազորի և պայմանագրային զինծառայողի միջև: Արդյո՞ք այդ կատեգորիայի համար սահմանված են լինելու սոցիալական որոշակի երաշխիքներ և արտոնություններ և ի՞նչ բնույթով է փոխհատուցելու այդ ռեզերվիստի կարգավիճակը»։

Վիգեն Սարգսյանը պատասխանեց, թե պահեստազորի սոցիալական ապահովության հարցը ենթաօրենսդրական կարգավորումներով են ապահովվելու. «Մեր տրամաբանությունը և քաղաքականությունը լինելու է այն, որ մենք բավականաչափ գրավիչ պայմաններ ստեղծենք, որ մարդիկ պահեստազորի մեջ ցանկություն ունենան ակտիվ ընդգրկվել և այն մասնագիտությունները, որոնք մեզ համար կարևոր են, կարողանանք համալրել այդ թվերը: Կարծում եմ՝ կգտնենք այդ ոսկե միջինը, որ մի կողմից շահագրգռենք մարդկանց, մյուս կողմից չստեղծենք գերծանրաբեռնվածություն ռազմական բյուջեի համար՝ հաշվի առնելով այն, որ ճիշտ չէ, որ ռազմական բյուջեում փոխհատուցումները գերակայեն տեխնիկայի համալրմանը,  թե դա կառավարության որոշումներով կկարգավորվի»։

Անդրադառնալով պահեստազորի հետ կապված աշխատանքներին՝ նախարարը պատասխանեց, որ այստեղ նոր մոտեցում են որդեգրել. «Մենք առշունչ ամենամեծ բանակ ունեցող երկրներից մեկն ենք աշխարհում և ունենք քաղաքացիների հսկայական թիվ, ովքեր անցել են ծառայությունը, այդ թվում՝ նաև մարտական հերթապահության պայմաններում և պարտավոր ենք ձևավորել համակարգ, որ այդ համակարգը լիարժեք պետք եղած ժամանակ ծառայի երկրի պաշտպանության գործին: Խնդիր ունենք պարբերաբար վարժանքների, միջոցառումների՝ զորահավաքը արդյունավետ կազմակերպելու համար»,-ասաց նա:

Արման Սաղաթելյանը նաև հետաքրքրվեց, թե ինչ տրամաբանությամբ է կազմվում պահեստազորի խումբը. «Պահեստազորի առաջին և երկրորդ խմբերի կառուցվածքի սահմանումը որքանով է ճիշտ, երբ երկրորդ խմբում օգտագործելու են ավելի քիչ մարդկանց, բայց ավելի երկար են պահելու։ Ինչո՞ւ են այն մարդկանց, ովքեր չեն անցել պարտադիր զինվորական ծառայություն, ընդգրկում նույն խմբի հետ, ովքեր մասնակցել են հայրենիքի պաշտպանությանը: Կարծում եք նպատակահարմար է, որ այդ մարդիկ լինեն նույն կատեգորիայում, քանի որ չծառայողներն առողջական խնդիրներ ունեն, և նրանք պահեստազորայինների ինչների՞ն են պետք»,-հարցրեց նա:

Վիգեն Սարգսյանը պատասխանեց, որ երկրորդ խմբում ավելի երկար են մնում, որովհետև նրանք կարող են պետք գալ վերջին հերթին, երբ որ արդեն այլևս առաջին խումբը չի բավարարում խնդիրը լուծելու համար:

«Խմբերի տրամաբանությունն ու քաղաքականություն այն է, որ զինկոմիսարիատներում որոշում կայացնելիս շատ ավլեի հեշտ լինի զտել ֆիզիկական պատրաստվածության մակարդակը և գիտելիքների աստիճանը։ Զինվորական գործում ավելի մեծ հենք ունեցողները կարող են շատ ավելի երկար լինել առաջին պահեստազորում, և զորահավաքի ժամանակ օգտագործվի նրանց փորձը»,-ավելացրեց նա: