Ձեր վստահելի աղբյուրը

Երևանում մեկնարկեց Եվրասիական միջկառավարական խորհրդի նիստը:

Նիստին մասնակցում են  Եվրասիական տնտեսական միության (ԵԱՏՄ) անդամ  պետությունների կառավարությունների ղեկավարներ՝ ՀՀ վարչապետ Կարեն Կարապետյանը, ՌԴ վարչապետ Դմիտրի Մեդվեդևը,  Բելառուսի վարչապետ Անդրեյ Կոբյակովը,  Ղազախստանի վարչապետ Բակիջան Սագինտաևը, Ղրղզստանի վարչապետ Սապար Իսակովը, ինչպես նաև Եվրասիական տնտեսական հանձնաժողովի (ԵԱՏՀ) կոլեգիայի նախագահ Տիգրան Սարգսյանը։

Նիստի բացմանը ՀՀ վարչապետ Կարեն Կարապետյանը նշեց, որ նեղ նիստում քննարկել են մի շարք հարցեր, այդ թվում՝ ԵԱՏՄ թվային օրակարգի իրականացման շրջանակում նախաձեռնությունների մշակման կարգը, ԵԱՏՄ ներքին շուկայում 2018-2019 թվականներին սահմանափակումների վերացմանն ուղղված միջոցառումների ծրագիրը (ճանապարհային քարտեզը)։

Նշենք նաև, որ օրակարգում ընդգրկված են ներքին շուկաների գործունեությանը, առևտրին, ագրոարդյունաբերությանը, էներգետիկայի և ենթակառուցվածքների ոլորտներին վերաբերող հարցեր։

Նիստի մասնակիցները կանդրադառնան նաև ԵԱՏՄ էլեկտրաէներգետիկական ընդհանուր շուկայի շրջանակում տեղեկատվության փոխանակման համակարգի ձևավորմանն առնչվող հարցերին։ Օրակարգային թեմաներից է նաև 2018-2020 թվականներին ԵԱՏՄ անդամ պետությունների համակարգված տրանսպորտային քաղաքականության իրականացման փուլերի և հիմնական ուղղությունների միջոցառումների ծրագրի քննարկումը։ Կհայտարարվեն նաև ԵԱՏՄ այն երկրները, որտեղ 2018-2020 թվականներին նախատեսվում է անցկացնել ավանդական «Եվրասիական շաբաթ» ցուցահանդեսային համաժողովը։