Ձեր վստահելի աղբյուրը

Այս նախագծի հիմքում երկու լրջագույն խնդիր է ընկած՝ կանխել կոռուպցիան և հաստատել արդարություն այս ոլորտում, և բանակը դարձնել գրավիչ։ Ձեր կարծիքով, նախագիծն այս խնդիրը լուծելու՞ է, թե՞ ոչ»։ ԱԺ-ում «Զինվորական ծառայության և զինծառայողի կարգավիճակի մասին» օրենքի նախագծի քննարկման ժամանակ «Ծառուկյան» դաշինքի պատգամավոր Նաիրա Զոհրաբյանը նման հարց ուղղեց հիմնական զեկուցող ՀՀ պաշտպանության նախարար Վիգեն Սարգսյանին։

«Նախագծի փիլիսոփայությունն առաջին հերթին բանակը սոցիալական վերելակի վերածելն է։ Այսինքն նրանք ովքեր ընտրում եմ բանակում ծառայության հատուկ տեսակներ, այդ թվում երեք տարվա սպայական ծառայությունը, կամ կամավորական հիմունքներով ընտրում են ավելի բարդ՝ մարտական հերթապահություն իրականացնող զորամասերում ծառայությունը, պետք է արդյունքում ստանան զգալի արտոնություններ և դրանք օգտագործեն իրենց սոցիալական կարգավիճակի բարելավման, հետագա խնդիրների լուծման համար։ Բանակը պետք է նաև ուսուցանող գործառույթ իրականացնի և զուգահեռ բազմաթիվ ծրագրերով փորձում ենք լուծել այդ խնդիրը։ Իհարկե, ես չեմ համարում, որ օրենքի ընդունմամբ խնդիրը կարող է լուծվել, օրենքը ստեղծում է հնարավորություն, դաշտ՝ ակտիվ աշխատանքի միջոցով այդ քաղաքականությունն իրականացնելու։ Բայց չափազանց կարևոր է, որպեսզի այս դրույթներն ընդունվեն, որ հնարավոր լինի այդ ծրագրերը լիարժեք կյանքի կոչել»,- պատասխանեց հիմնական զեկուցողը։

Պատգամավորն արձագանքեց՝ ասելով. «Կարող եք նշել թվել, արդեն իսկ կա՞ն կամավորենր, ովքեր դիմել են «Պատիվ ունեմ» և «Ես եմ» ծրագրերի համար»։

Սրան ի պատասխան նախարարն ասաց, որ ծրագրերի մինչև իրավական հիմքեր չունենան օրենքի ընդունմամբ, չեն կարող ակտիվ գովազդել և հավաքագրել մարդկանց. «Բայց մենք անցկացրել ենք հարցումներ երիտասարդների, ուսանողների շրջանում, և պետք է ասեմ, որ բավականին դրական են արդյունքները։ Վստահ եմ, որ երկու ծրագրերն էլ լինելու են պահանջված»։

Պաշտպանության նախարարին հարց ուղղեց «Ելք» խմբակցության պատգամավոր Արարատ Միրզոյանը, նշելով թե նախարարը կարևորել է, որ այս նախագիծն ընդունվի կոնսենսուսով. «Այդ կոնսենսուսին հասնելու համար որքա՞ն է  ձեր անձնական փոխզիջումային պատրաստակամությունը, քանի որ բազմաթիվ լավ դետալներին զուգահեռ կան որոշ դետալներ, որոնք հասարակության, նաև խորհրդարանականների կողմից չեն ընդունվել»։

Նախարարը նշեց, թե հանրային քննարկումների նպատակը հենց դա էր, և չի հիշում նրանց հետ հանդիպման ժամանակ հնչած որևէ բովանդակային առաջարկ, որ «Պատիվ ունեմ» և «Ես եմ» ծրագրերում չի ներառվել:

«Ես բավականին ճկուն եմ քաղաքականություն մշակելիս, արել եմ ամեն ինչ, որ լսեմ բոլորի ձայնը, այդ ձայնի մեջ չի եղել դեմ կարծիք, չի եղել առաջարկ, որը մանրամասն չի քննարկվել։ Ուզում եմ ևս մեկ անգամ  հստակեցնել, որ մենք ընդամենն իրավական դաշտն ենք ձևավորում, բայց նախատեսված է, որ ծառայության պայմանները և կանոնները պետք է սահմանվեն կառավարության կողմից: Մենք կարող ենք լրացուցիչ դեպքեր քննարկել՝ գիտությամբ զբաղվող առանձնահատուկ հաջողության հասած երիտասարդ գիտնականների ծառայության հատուկ պայմաններ ապահովելու համար: Քաղաքականությունը ելնում է նրանից, որ պետք է ծառայեն բոլորը. ով ի վիճակի է ծառայել որպես սպա՝ բարձրագույն կրթություն ունեցող կամ գիտական ներուժ ունեցող մարդը կարող է ծառայել որպես սպա, ով չի ցանկանում, ուզում է արագ երկու տարի շարքային ծառայություն անցնել, կարող է այդ տարբերակն ընտրել: Որևէ պարտադրանք այս քաղաքականություններն իրենց մեջ չեն պարունակում, ընդամենը լրացուցիչ հնարավորություն է տալիս ընտրելու, թե ինչ ձևով է քաղաքացին իր սահմանադրական պարտքը կատարել»,-ասաց նախարարը:

Վիգեն Սարգսյանն այստեղ իր անձնական օրինակը բերեց. «Ես անձամբ իմ պարտքը կատարել եմ որպես սպա, որովհետև այդ պահին ունեցել եմ երեք բարձրագույն կրթություն, թեև ունեցել եմ հնարավորություն այդ կրթությունով աշխատել բազմաթիվ միջազգային կազմակերպություններում, որի համար մեր օրենսդրությամբ տալիս էին տարկետում, բայց ես ընտրել եմ ԶՈւ-ում որպես սպա ծառայելու տարբերակը և հպարտ եմ այդ տարիներով։ Համարում եմ, որ այդ 3 տարին ինձ շատ բան է տվել։ Գիտությունից ինձ առանձնապես հետ չեմ պահել, որովհետև դրանից հետո մեծ ոգևորությամբ դասավանդել եմ տարբեր մագիստրոսական ծրագրերում, թեև զբաղվածությունս թույլ չի տվել թեկնածուական թեզ պաշտպանել, բայց այսօր պաշտպանող թեզերի հեղինակներին ինչ-որ առումով չեմ էլ զիջում՝ քաղաքական գիտությունների և միջազգային հարաբերություների հարցերում: Դա է իմ մոտեցման առանցքը, իսկ մնացածը կարելի է քննարկել»։

Հիմնական զեկուցողը վստահեցրեց՝ եթե կան մարդիկ, ովքեր գտնում են, որ այս օրենքով գիտական հեռանկարները քայքայվում են, այդպես չէ:

Արարատ Միրզոյանն արձագանքեց, որ շատ հարցերում համաձայն չէ, բայց կփորձեն բանակցել խորհրդարանական լսումների ժամանակ։

Վիգեն Սարգսյանն էլ ասաց, որ ինքը տեղյակ է Միրզոյանի համաձայն չլինելու մասին, ուսանողներն են իրեն դրա մասին ասել։

«Ելք»-ի պատգամավոր Մանե Թանդիլյանն էլ նախարարից հետաքրքրվեց, թե արդյո՞ք նա հանդիպել է բողոքող ուսանողների հետ։

«Բազմիցս  ուսանողների հետ հանդիպել եմ, չգիտեմ պատգամավորի նշած ուսանողները եղե՞լ են, թե ոչ»,-ասաց նախարարը։

Պատգամավորի խոսքով՝ բողոքող ուսանողները առաջարկում են, որ, օրինակ, տարկետման քանակը կրճատելը լինի ռոտացիայով։

«Այդ թվերը կրճատելը մեկ այլ խնդիր է բերելու։ Նեղանալու է ոսկե երիտասարդության այն շրջանակը, որոնք այդ քիչ տարկետումից կարողանալու են օգտվել. ես դեմ եմ դրան՝ կամ բոլորը ունեն տարկետում, կամ ոչ ոք չունի, դա է իմ սկզբունքային մոտեցումը»,-ասաց Սարգսյանը։

Մանե Թանդիլյանը նաև հետաքրքրվեց, թե արդյոք այս օրենքը նախատեսո՞ւմ է վերացնել հետախուզումը 27 տարեկանը լրանալուց հետո՝ որոշակի վճարումների դիմաց և նախարարի մոտեցումն ինչպիսի՞ն է այս հարցում։

«Այս հարցում իմ մոտեցումները չեն փոխվելու։ Ես գիտեմ, որ պատգամավորները նոր նախագիծ են նախատեսում, երբ այն կլինի, կխոսենք։ Ես դեմ եմ այդ նախագծին, առիթ ունեցել եմ դրա մասին խոսել, կառավարությունում այս դահլիճում, իմ մոտեցումները չեն փոխվելու։ Ես համարում եմ, որ չի կարելի գումարով սահմանադրական պարտականությունից ազատվել և համարել, որ ամեն ինչ նորմալ է, որ ինչ-որ մեկը փող ունի, չի ծառայում, իսկ ով անապահով է, առաջնագծում ծառայում է. իմ մոտեցումները սրանք են»,-ասաց նա։