Ձեր վստահելի աղբյուրը

Հանրապետական խմբակցության պատգամավոր, Շիրակի նախկին մարզպետ Ֆելիքս Ցոլակյանն օրենսդիր ու գործադիր մարմինների ներկայացուցիչներին մինչ բյուջեի քննարկումների մեկնարկը հիշեցրեց, Գյումրիում օլիմպիական չեմպիոն Արթուր Ալեքսանյանի անունը կրող մարզադպրոց է գործում:

«Հինգ տարի է, որ խոստանում են  էդ մարզադպրոցը վերանորոգել: Նախատեսված էր, 340 մլն դրամ, կա նախագիծ: Բյուջեի նախագիծը նայում եմ, հատկացում չկա»,-ասաց Ցոլակյանը՝ նշելով, որ օլմպիական չեմպիոնին խոստումներ տալն ու չկատարելը լավ բան չէ:

Նա հիշեցրեց, խոստում տվողներից մեկն էլ սպորտի և երիտասարդության հարցերի նախարարությունն է:

«Պարոն Ցոլակյան, մենք ինչ խոստում տալիս ենք, իրականացնում ենք»,-հայտարարեց ամբիոնին մոտեցած սպորտի և երիտասարդության հարցերի նախարար Հրաչյա Ռոստոմյանը:
Նախարարն ասաց, որ դպրոցն անմխիթար վիճակում է, հնարավոր չէ վերանորոգել, պետք  է նոր դպրոց կառուցել, մասնագետներն էլ են առաջարկել:

«Այս պահի դրությամբ մինչև ամսվա վերջ կվերջացնենք նախագծային աշխատանքները»,-ասաց Ռոստոմյանը:

Նա ասաց, որ դպրոցի մեջտեղում երկրաշարժից հետո մի ընտանիք տուն է սարքել, տարածքը սեփականացրել:

«Մենք ցանկանում ենք խնդիրներից զերծ մնանք,  Արթուր Ալեքսանյանին վայել միջազգային դպրոց սպորտդպրոց սարքենք, որտեղ ուշ թե շուտ կունենանք Ալեքսանյանի անվան միջազգային մրցաշար, ոչը կմտնի վարկանշային ցուցակի մեջ: Դրա համար մեզ հարկավոր է միջազգային ստանդարտներին համապատասն, 700 հանդիսատես ունեցող դպրոց սարքել»,-ասաց նախարարը:

Հ. Ռոստոմյանի խոսքով, այն կկառուցվի համատեղ ֆինանսավորմամբ, որին կմասնակցի Հայաստանի ազգային օլիմպիական կոմիտեի նախագահը:

«Խոստումները վաղուց են սկսել, հինգ տարի դրանք կան: Ոչ թե ուզում եմ վատաբանել, հույս ունեմ, որ կսկսի»,-ասաց նա:

Նախարարն էլ հակադարեձեց. «Ի տարբերություն շատերի մենք մեր խոստումները կատարել ենք, այդ դպրոցը վերանորոգման ենթակա չէ»: