Ձեր վստահելի աղբյուրը

ՍԱՊԾ պետ Իշխան Կարապետյանը որպես հիմնական զեկուցող ԱԺ-ում ներկայացրեց «Վարչական իրավախախտումների մասին» օրենսգրքում, «Սննդամթերքի անվտանգության մասին», «Անասնաբուժության մասին» օրենքներում փոփոխություններ ու լրացումներ կատարելու մասին օրինագծերի փաթեթն  առաջին ընթերցմամբ ընդունելու մասին հարցը:

Նրա խոսքով, փոփոխությունների նպատակն է պարտադիր սպանդային մորթի իրականացման համար իրավական հիմքեր ապահովելն ու հստակեցնելը: Դրանց արդյունքում ներդրվելու է պահանջ, որ մորթը պարտադիր կերպով պետք է կատարվի սպանդանոցում, կենդանական ծագման մթերքի մակնշման մեջ պետք  է լինի սպանդանոցի մասին տվյալներ ներառելու պահանջ:

«Այն պետք է պարունակի սպանդանոցի անվանումը, սպանդի ամսաթիվը, իսկ վերամշակված մսամթերքի պարագայում՝ նաև մսի տեղական արտադրության սպանդանոցային ծագման կամ ներմուծված լինելու մասին տեղեկատվություն»,-ներկայացրեց Իշխան Կարապետյանը:

Սահմանվում է նաև իրավական հետևանքներ այդ պահանջները չպահպանող իրավաբանական ու ֆիզիկական անձանց համար:

«Սահմանվում է վարչական տույժի տեսակն ու չափը: Ֆիզիկական անձանց նկատմամբ այն կազմում է 20 հազար դրամ, իսկ պաշտոնատար անձանց նկատմամբ՝ 100 հազար դրամ»,-ասաց ՍԱՊԾ պետը:

Վարչական պատասխանատվություն սահմանելու իրավունք ունի անասնաբուժության բնագավառում պետական վերահսկողություն իրականացնող մարմինը:

Բայց սա չի նշանակում, որ մարդը չի կարող անձնական օգտագործման մսի մորթն իրականացնել բակային պայմաններում: Սպանդանոցային մորթը պարտադիր է իրացման համար նախատեսված մսի պարագայում, բացառությունները սահմանված են օրենքով:

«Ոչ սպանդանոցային պայմաններում մորթը կթույլատրվի կրոնական կամ այլ ընդունված ծիսակատարությունների համար, որսորդության և ձկնորսության ժամանակ, անձնական սպառման համար, ինչպես նաև անասնահամաճարակային միջոցառումների ժամանակ»,-բացառությունները թվարկեց ՍԱՊԾ պետը:

Նա բացատրեց, սպանդանոցային մորթի անցումն անհրաժեշտ է առաջին հերթին սպառողների առողջությանը սպառնացող հնարավոր վտանգը կանխելու կամ չեզոքացնելու տեսանկյունից, այն շատ կարևոր նշանակություն ունի նաև անասնահամաճարակային վիճակը հսկելու ու կայուն պահելու համար, կենդանական մթերքի երկրորդային աղտոտվածությունը բացառելու առումով:
Բացի այս կարգավորումներից, ըստ զեկուցողի, սահմանվել ու խմբագրվել են մի շարք հասկացություններ՝ մսեղից, կիսամսեղիք և այլն երկակի մեկնաբանությունից խուսափելու համար:

«Ծառուկյան» խմբակցությունից Կարինե Պողոսյանը հիմնական զեկուցողից հետաքրքրվեց, թե այս պահին հանրապետությունում գործող սպանդանոցները կարո՞ղ են ապահովել առկա պահանջարկը, ի՞նչ փուլում է նոր սպանդանոցների կառուցման գործը:

«Գնահատվել է սպանդանոցային կարողությունների ծավալը: Այն կազմում է 40-70՝ կախված  չափից ու ձևից: Ներկայումս առկա է 16 սպանդանոց, որից 8-ը իրականացնում են գործունեությունը, 8-ը կգործեն օրենքի ուժի մեջ մտնելուց հետո»,-ասաց Կարապետյանը:

Նրա խոսքով, Հայաստանի տարածքում հավասարաչափ բաշխված մոտ 40 սպանդանոց է լինելու, հիմա սպանդանոցային կարողությունների զարգացման ծրագիր է իրականացվում: Շուկայական տնտեսության պայմաններում սպանդանոցների սեփականատերերն ինքնուրույն են որոշելու գնային քաղաքականությունը, լինելու է գերմրցակցային ոլորտ: