Ձեր վստահելի աղբյուրը

Ադրբեջանական կողմը հակառակ է գործում պայմանավորվածություններին, որոնք ձեռք են բերվում հանդիպումների ժամանակ: Այս մասին այսօր կառավարության նիստից հետո լրագրողների հետ զրույցում ասաց ՀՀ արտաքին գործերի փոխնախարար Շավարշ Քոչարյանն՝ անդրադառնալով Ժնևում կայացած հանդիպումից հետո ՀՀ Նախագահի հայտարարության կապակցությամբ ադրբեջանական կողմի արձագանքին:

«Հայտարարվել էր այն մասին, որ լարվածությունը պետք է նվազի, սակայն կատարվում է ճիշտ հակառակը, և դա արդեն դարձել է օրինաչափություն:  Վիեննայում մի բան են պայմանավորվում, բայց Ադրբեջանի քայլերն ուղղված են դրանք խոչընդոտելուն, նույնը՝ Սանկտ Պետերբուրգում: Ցավալի է, բայց խնդիրը կայանում է նրանում, որ Ադրբեջանն իր անհեռատես քայլերով ինքն իրեն մղել է դեպի փակուղի: Եւ անկանոն քայլերով և գործողություններով Բաքուն նաև փակում է նույնիսկ ելքն այդ փակուղուց»,-ասաց փոխնախարարը:

Շավարշ Քոչարյանի խոսքով՝  Ադրբեջանին վրդովվեցրել է այն, որ հայտարարվել է մի շատ պարզ բան՝ ԼՂ հարցի ցանկացած կարգավորում ենթադրում է, որ Արցախը չի կարող լինել Ադրբեջանի կազմում:

«Դրա շուրջ սկսվել է վայնասուն Ադրբեջանում: Սակայն, երբ Բաքուն հարցականի տակ է դնում Արցախի Հանրապետության անկախությունը, ինքը ձևացնում է, թե մոռացել է, որ նույն հիմքով անկախացել է թե՛ ԼՂՀ-ն, թե՛ Ադրբեջանը: Դա եղել է դեռևս ԽՍՀՄ օրոք՝ համաձայն վերջինիս սահմանադրության: ԽՍՀՄ փլուզումով երկուսն էլ իրավահավասար են, ավելին՝ Արցախում անկախության մասին հանրաքվեն ավելի վաղ է անցկացվել, քան Ադրբեջանում»,- ընդգծեց փոխնախարարը՝ հավելելով, որ իր անհեռանկար քայլերով կամ հայտարարություններով Ադրբեջանն իր անկախությունն է հարցականի տակ դնում. «Եթե Ադրբեջանի համար սուրբ է տարածքային ամբողջականությունը, ապա ինչո՞ւ է անկախացել»:

Շավարշ Քոչարյանը նշեց, որ բանակցություններին խանգարողը Ադրբեջանն է, այնպես չէ, որ հայկական կողմերը խուսափել են բանակցություններից, ճիշտ հակառակը, սակայն երբ հակառակորդը պարտադրում է և ասում՝ ամեն ինչ պետք է լինի այնպես, ինչպես ես եմ ուզում, ապա բնական է՝ տեղիք տալ չի կարելի:

Ինչ վերաբերում է բանակցությունների հեռանկարին, փոխնախարարն ասաց՝  համանախագահները շատ հստակ խոսել են իրենց բազմաթիվ հայտարարություններում, որ բանակցությունների առաջընթացի համար անհրաժեշտ է համապատասխան հիմք, իսկ հիմքը կողմերի միջև վստահությունն է: Իսկ այդ վստահությունը ձեռք բերելու համար, ըստ Շ.Քոչարյանի, անհրաժեշտ է, որ Ադրբեջանը կատարի միջազգային պարտավորությունները:

Անդրադառնալով բանակցություններում ձեռք բերված պայմանավորվածություններին՝ փոխնախարարն ասաց, որ դրանք հայկական կողմը երբեք չի խախտել ու չի էլ խախտի:

«Այն, ինչ լինում է սեղանի շուրջ՝ փակ բանակցություններում, հայկական կողմը երբեք չի խախտել և չի էլ խախտի։ Խախտողը մենք գիտենք ով է՝ միշտ Ադրբեջանն է: Այն, ինչ խոսվում է բանակցությունների սեղանի շուրջ, դրանից հետո լրիվ ուրիշ բաներ է ասում, դա այնքան ակնհայտ է: Բավական է ուսումնասիրել ԵԱՀԿ Մինսկի խմբի համանախագահող երկրների նախագահների հինգ հայտարարությունները, որտեղ բացահայտվել են բանակցությունների սկզբունքները ու համեմատել ադրբեջանական հայտարարությունների հետ»,-ասաց նա:

Հարցին, թե համանախագահներին բարձրաձայնվե՞լ է, որ Ադրբեջանը խախտում է պայմանավորվածությունը, Շավարշ Քոչարյանը պատասխանեց. «Ի՞նչ է նշանակում բարձրացնել մի բան, որն անզեն աչքով երևում է, առավել ևս՝ համանախագահների համար»։

Փոխնախարարը նշեց նաև, որ ինքը բանակցությունների նյուանսներին ծանոթ չէ, բայց այն, որ ապրիլյան պատերազմը լուրջ ազդեցություն է թողել նաև միջնորդների մոտեցումների վրա, դա երևում է նաև իրենց հայտարարություններում: