Ձեր վստահելի աղբյուրը

«Ելք» խմբակցության պատգամավոր Արարատ Միրզոյանը կոչ է անում բանակում երկարաժամկետ համակարգային փոփոխություններ իրականացնել, ոչ թե իրավիճակային լուծումներ տալ:

«Ներմուծեցիք 12-ամյա հիմնական կրթության պարտադիր լինելը, երկու տարի առաջացած բացը փորձում եք այս ձևով  լուծել: Հիմա երկու տարի հետո խնդիրը վերանալու է, էլի բերելու եք, օրենքը փոխեք, հետո էլի կոսմետիկ փոփոխություններ անեք»,-ասաց պատգամավորը:

Ընդդիմադիր գործիչը նշեց, որ տարկետման հետևանքով վնասվելու է երկրում ինտելեկտուալ ներդրումը:

«Եթե նույնիսկ ասպիրանտուրա գնացած 140 տղաներից 7-ն են զբաղվում գիտությամբ, ապա դա պետք է լինի մեր զոհողությունը, որպեսզի առանց այդ էլ մեռնող ոլորտը չփակվի: Սա հենց բանակի համար է վատ լինելու: Երբ մագիստրոսները գնում են բանակ, ինտելեկտուալ ներարկում են անում բանակում: Երբ բոլորը գնան 18 տարեկանից, որևէ մասնագիտություն չունենալով, այդ ներարկումից էլ ենք զրկվում, դառնալու է բանվոր-գյուղացիական բանակ»,-ասաց Միրզոյանը:

Նա վստահություն հայտնեց, որ Հայաստանը կարող է դառնալ առաջատար գիտական երկիր, իսկ զարգացնելու փոխարեն հիմա հետընթաց ենք արձանագրում:

«Շատերս ընդունում ենք, որ հիմա իրավիճակը վատ է, բայց հույս կա, հեռանկար կա, որ մենք կարող ենք դառնալ մեր երազանքների Հայաստանը: Այս օրինագծով  մենք այդ հեռանկարի մեջքն էլ ենք կոտրում: Ես հասկանում եմ, որ կուսակցական խնդիրներ կան, հրահանգ կա, որոշում կա, բայց առաջարկում եմ ևս մեկ անգամ դրա մասին մտածել, այսօրվա խնդիրների համար հեռանկարը չվնասենք»,-ասաց Ա. Միրզոյանը:

Ելույթից հետո մինչ խմբակցության «Հանրապետական» և «Ելք» խմբակցություններին ձայն տալը ԱԺ փոխնախագահ Էդուարդ Շարմազանովն օգտվեց արտահերթ ելույթի իրավունքից, ասաց, նախորդ օրերի քննարկումներին հետևել է Արցախից:

«Չծառայելն ու դասալքությունը տարբեր բաներ են: Ես լսում էի, ասում են, բա ինչի՞ սա չի ծառայել, նա չի ծառայել: Էդ ինչ է, միայն պետական պաշտոնյաները չե՞ն ծառայել: Չկա՞ն այլ մարդիկ ընդդիմության մեջ, որ օրենքով սահմանված կարգով չեն ծառայել»,-ասաց Շարմազանովը:

Նա հայտարարեց, որ ինքն էլ տարկետման իրավունքից չի օգտվել, պաշտպանել է թեզը, ապիրանտուրայում որպես հայցորդ է  եղել, քանի որ ազդեցիկ զանգահարող չի ունեցել, բայց զինկոմիսարիատներ ներկայացել է պարտաճանաչ կերպով:

«11 տարի է՝ ասում եք, Շարմազանովը չի ծառայել: Մի հատ հետաքննություն արեք ընդդիմադիրներով, լրագրողներով, տեսեք՝ ինչի չի ծառայել, խուսափե՞լ է, թե՞ ոչ: Որ թերթը բացում ես, գրած է դասալիք է, դասալիք է, դասալիքը ձեզ պատվեր տվողներն են»,-ասաց նա՝ խոստանալով, եթե բացահայտվի, որ ինքը խուսափել է ծառայությունից, ապա կհեռանա քաղաքականությունից, կթողնի պաշտոնը:

Աժ փոխնախագահը հայտարարեց, որ Ազգ-բանակ հայեցակարգի մասին հայտարարած պաշտպանության նախարարի կողքին  է լինելու:

«Ես Ձեր դաշնակիցն եմ, և պատրաստ եմ Ձեզ հետ գնալ մինչև վերջ»,-ասաց նա:

Հիշեցնենք, որ Ազգային ժողովում շարունակվում է «Զինվորական ծառայության և զինծառայողի կարգավիճակի մասին» ՀՀ օրենքի նախագծի քննարկումը: