Ձեր վստահելի աղբյուրը

Այս պահին հարուցված է ավելի շատ քրեական գործ և մարդկանց ներկայացված է մեղադրանք: Եռաբլուրում լրագրողների հետ զրույցում ասաց ՀՀ պաշտպանության նախարար Վիգեն Սարգսյանը՝ պատասխանելով հարցին, թե առողջապահության ոլորտում կան մի շարք սողանցքներ, որոնք հնարավորություն են տալիս կեղծ թղթերով բանակից ազատվել։

«Թեև սա պաշտպանության նախարարության ոչ գործն է, ոչ էլ մեր ձեռքբերումը, այլ  համապատասխան իրավապահ մարմինների, բայց պատվերը շատ հստակ է մեր կողմից՝ այդ գործերը պետք է քննվեն մինչև վերջ և մեղավորները պետք է պատիժ կրեն։ Մենք պետք է ստեղծենք այնպիսի վիճակ, որ բժշկական ոլորտում ևս սողանցքները փակվեն», - նշեց նախարարը:

Պատասխանելով հարցին, թե այսօր կարծիքներ են հնչում, որ «Զինվորական ծառայության և զինծառայողի կարգավիճակի մասին» օրինագիծը կարող է բերել արտագաղթի, շատերը քաղաքացիությունից հրաժարվելու դիմումներ են գրում և մինչև 17 տարեկան իրենց որդիներին դուրս հանում Հայաստանից, Վիգեն Սարգսյանն ասաց. «Միշտ եղել են և լինելու են մարդիկ, որոնք անձնական, ընտանեկան երջանկությունը վեր են դասում պետականից, համազգայինից: Այդպիսի մարդկանց ընտրությունն իրենց խղճի ու իրենց ընկալման ընտրությունն է։ Եթե հայրենիքը մեզ համար միայն ամառային արձակուրդի անցկացման վայր դարձնենք, եթե հայրենիք սիրենք հեռվից, հիանանք վանքերով, տարին մեկ անգամ այստեղ երեխաներին մկրտենք, դա էլ է հայրենասիրության տեսակ, երևի թե: Ես համարում եմ, որ մի ժողովրդի համար, որը հազարամյակների միջով քայլել է առանց պետականության և ձեռք է բերել պետականություն, ամոթ է տղային փախցնելը երկրից՝ բանակում չծառայելու համար: Մնացած ամեն ինչը յուրաքանչյուր քաղաքացու ընտրության հարցն է», - նշեց Վիգեն Սարգսյանը։

Հարցին, թե հանդիպել եք ԱԺ դիմաց բողոքող ուսանողների հետ, նախարարն ասաց. «Ես պարբերաբար հանդիպում եմ ամենատարբեր ուսանողական կառույցների ներկայացուցիչների հետ: Տեղյակ եմ, որ «Ելք» դաշինքից պարոն  Արարատ Միրզոյանն ակտիվ հրահրում էր մի քանի երիտասարդի համալսարանում դասադուլ սկսելու: Նրանցից մի քանիսի հետ հանդիպել եմ՝ առանց լուսաբանելու: Իրենք ինձ մանրամասն պատմել է, թե ինչպես է ընթացել այդ թեմայով իրենց երկխոսությունը «Ելք»-ի հետ։ Քաղաքական մշակույթի հարց է, ամեն մեկն իր ձևով է ընտրում»:

Պատասխանելով հարցին, թե ՀՀԿ-ականներին, իշխանությունների մեծ մասին համարո՞ւմ եք դասալիք և Սահմանադրությունը խախտող, որովհետև, այնուամենայնիվ,  խուսափել են ծառայությունից, Վիգեն Սարգսյանն ասաց. «Ոչ, ես ձեր գնահատականը համարում եմ ոչ կոռեկտ: Եթե դուք համարում եք, որ, օրինակ,  Նիկոլ Փաշինյանը, նույն Արարատ Միրզոյանը դասալիք են, որովհետև օգտվել են տարկետումից, ապա ձեր գնահատականը  բոլորի համար հավասարապես ճիշտ է: Ես չեմ համարում, որ նրանք դասալիք են: Ուզում եմ հիշեցնել, որ խորհրդարանում այդ ձևակերպումներն և այդ լեզուն ես չեմ սկսել օգտագործել: Ես Արարատ Միրզոյանի պատվոգիր ստանալու թեման բարձրացրել եմ նրանից  հետո, երբ որ «Ելք» դաշինքը բարձրացրել է բանակում չծառայած, բայց բանակի գերատեսչական մեդալներով պարգևատրվածների հարց: Ես էլ ասել եմ, որ պետք է աչքի գերանը նկատել, հետո դիմացինի աչքի փուշը»: