Ձեր վստահելի աղբյուրը

Տարիներ շարունակ սպանդանոցային մորթի անհրաժեշտության մասին բարձրաձայնած «Իրազեկ և պաշտպանված սպառող» ՀԿ նախագահ Բաբկեն Պիպոյանն անհանգստացած է օրենքի հապշտապ ընդունումից: Նա ցավ է հայտնում, որ Ազգային Ժողովում օրենքի քննարկման ժամանակ պատգամավորները կարևոր հարցեր չհնչեցրեցին:

«Կողմ քվեարկած բոլոր պատգամավորներին հիմա հարցնում եմ, ինչո՞ւ նման լծակ տվեցիք լիազոր մարմնին, բա դուք կոռուպցիայի դեմ եք պայքարում»,-Panorama.am-ի հետ զրույցում ասաց ՀԿ նախագահը:

Նա  կարծում է, որ հանրապետությունում  սակավաթիվ սպանդանոցների առկայության դեպքում, երբ հնարավոր չէ ողջ մորթը դրանցում իրականացնել,  նման օրենքը կոռուպցիոն ռիսկեր է պարունակում:

«Ստեղծվում է շատ լուրջ կոռուպցիոն սխեմա, որ  լիազոր մարմինը ինքը որոշի երբ տուգանի, երբ՝  ոչ»,-ասաց Պիպոյանն ու հիշեց դեպք, երբ  տարիներ առաջ մի սպանդանոց չգործելով հանդերձ՝ մսամթերքի մատակարարին թուղթ էր վաճառել, իբր մորթն իրականացվել է սպանդանոցում: Ստացվել էր, որ չգործող սպանդանոցն օրական մի քանի հազար մորթ է արել:

Այս առումով նա կարևորում է վերահսկողական մեխանիզմների առկայությունը, տեղեկատվության հստակեցումն ու հրապարակումը, թե հանրապետության տարածքում օրական ինչքան մորթ է իրականացվում, մեկ սպանդանոցն օրական քանի մորթ կարող է իրականացնել:

«Առանց այս հստակեցումների չի կարելի նման պահանջ դնել ու տուգանք սահմանել: Սպանդանոցային մորթի անցնելը լավ բան է, բայց պետք է ճիշտ իրականացնել: Պետք է հասկանալ, որ խոսելով չի: Հայտնի անեկդոտի սիգնալը պետք է անջատել»,-ասաց Պիպոյանը՝ անհասկանալի համարելով օրենքի ընդունումն այն պարագայում, երբ սպանդանոցները դեռ սարքված չեն:

Նրա կարծիքով, պետք էր առաջնահերթ կարգավորել մորթի իրականացումն ու մսամթերքի տեղափոխումը: Մարզերում պետք է ստեղծվեին սալիկապատ, բետոնապատ, ծածկ ունեցող, հոսող ջրով ապահովված տարածքներ, որպեսզի մորթն իրականացվեր հիգիենիկ պայմաններում: Դրա ինքնարժեքը կլիներ ավելի ցածր: Իսկ ժամանակի ընթացքում ենթակառուցվածքները կզարգանային:

«Իսկ երբ սպանդանոցային հզորությունները թույլ տային, որ ողջ մորթն իրականացվեր սպանդանոցներում, այդ ժամանակ կարելի էր օրենքի ուժով կարգավորել ու վերահսկողություն սահմանել»,-ասաց նա:

Նա անհասականելի է համարում ՍԱՊԾ տարածած հաղորդագրությունը, որտեղ նշվում է, թե երկրին պետք է 40-70 սպանդանոց:

«Եթե ասեին՝ 40-45, կհասկանայինք, 40-ի և 70-ի մեջը մեծ միջակայք կա: Ինչևէ, եթե դրա կարիքը կա, ապա նշանակում է, որ առկա հնարավորություններով հնարավոր չէ դաշտը փակել: Այսօր լավագույն դեպքում մորթի 20-25 տոկոսն է սպանդանոցներում իրականացվելու, դա նշանակում է, որ 75-80 տոկոսի պարագայում մարդը հնարավորություն չի ունենա մորթն իրականացնել սպանդանոցում: Այս պարագայում, լիազոր մարմինն ինքն է որոշելու խնդրի վրա աչք փակի, թե ոչ»,-ասաց նա:

Նշենք, որ ՍԱՊԾ սննդի շղթայի օպերատորների բազայում այսօր գրանցված է 16 սպանդանոց, որոնցից ներկայումս գործում են 8-ը:

Երեկ ԱԺ-ում ՍԱՊԾ պետ Իշխան Կարապետյանը ներկայացնելով «Վարչական իրավախախտումների մասին» օրենսգրքում, «Սննդամթերքի անվտանգության մասին», «Անասնաբուժության մասին» օրենքներում փոփոխություններ ու լրացումներ կատարելու մասին օրինագծերի փաթեթն  առաջին ընթերցմամբ ընդունելու մասին հարցը, հայտարարեց, որ նախագծով սահմանվում է վարչական տույժի տեսակն ու չափը: Ֆիզիկական անձանց նկատմամբ այն կազմում է 20 հազար դրամ, իսկ պաշտոնատար անձանց նկատմամբ՝ 100 հազար դրամ: