Ձեր վստահելի աղբյուրը

ՀՀ Ազգային ժողովն առաջին ընթերցմամբ ընդունեց «Զինվորական ծառայության և զինծառայողի կարգավիճակի մասին» օրենքի նախագիծը: Օրինագծին դեմ քվեարկեց միայն «Ելք» խմբակցությունը: Նախագիծն ընդունվեց 89 կողմ, 9 դեմ ձայների քվեարկությամբ:

Վարման կարգով ձայն խնդրեց պատգամավոր Էդմոն Մարուքյանը։

«Երեկ պաշտպանության նախարարն իր ելույթում ինձ հարց է ուղղել, իր հարցին պետք է պատասխանեմ, կրթության և ծառայության հետ է կապված։ Այո, ծառայության ընթացքում ես օրենքով արձակուրդներ եմ ստացել և հանձնել եմ քննությունը, մնացած պրակտիկան ստացել եմ ծառայությունից հետո: Իսկ վերին արտի ցորենի հետ կապված, եթե վերին արտի ցորեն լինեի, Սոյուղում, Հաջիբադում, Գեղիգյարդում, Ծիրանի ձորում չէի ծառայի, հուսով եմ՝ տեղը գիտեք»,-ասաց նա:

Պատգամավոր Մանե Թանդիլյանն էլ հայտարարեց. «Վիգեն Սարգսյանը երեկ նենգափոխել է իր հնչեցրած միտքը և անձնական դաշտ տարել, ինչին պատասխանել է ՊՆ-ին անհարիր էմոցիոնալ տոնով: Մենք գտնում ենք, որ տարկետումը չպետք է վերացվի և օրենքի լավ դրույթները կարող են համատեղվել տարկետման իրավունքի հետ»:

Խմբակցությունից վարման կարգով ձայն խնդրեց նաև Նիկոլ Փաշինյանը։

«Ի հեճուկս պաշտպանության նախարարի ներկայացման, մենք ասում ենք, որ ներկայացված նախագիծը իր թևերն է փռում պճեղի մինինգիտով բանակից ազատվողների վրա։ Փաստն այն է, որ այս պրոբլեմատիկան առաջիկայում ավելի է խորանալու և մենք այդ հիմնավորմամբ դեմ ենք օրենքին»,-ասաց նա:

Պատգամավոր Արարատ Միրզոյանն էլ անդրադարձավ չծառայած լինելով՝ ՊՆ պատվոգիր ստանալուն. «Պատվոգիր եմ ստացել այն բանի համար, որ «Քաղաքացիական պայմանագիր» կուսակցության այլ ներկայացուցիչների հետ որպես կամավոր ապրիլի 2-ից հետո գնացել եմ առաջնագիծ և կատարել մարտական հանձնարարություն, որը տվյալ դեպքում եղել է ինժեներական աշխատանքների տեսքով»: