Ձեր վստահելի աղբյուրը

Այսօրվանից ՀՀ ԱԺ մշտական հանձնաժողովներում մեկնարկում են ՀՀ 2018 թվականի պետական բյուջեի նախագծի քննարկումները։ Քննարկմանը ներկա կառավարության ղեկավար Կարեն Կարապետյանը հույս հայտնեց, որ դրանք արդյունավետ կլինեն։

«Մեր պատրաստակամությունն ենք հայտնում բոլոր հարցերին բաց, հրապարակային, կոնստրուկտիվ, օպտիմալ լուծումներ գտնելուն ուղղված քննարկումներին։ Համոզված եմ, որ քննարկումների արդյունքում կունենանք այս պահի դրությամբ մեր երկրի և քաղաքացիների շահերը լավագույնս արտահայտող և մեր զարգացման ծրագրերի ընթացքն ապահովող բյուջե 2018 թվականի համար»,- նշեց վարչապետը։

Կարեն Կարապետյանն ընդգծեց, որ հաշվի առնելով կառավարության 2017-2022 թվականների նպատակադրումները` 2018 թվականի բյուջեում հարկաբյուջետային քաղաքականության մոտեցումների մեջ փոփոխություններ են նախագծել. «Միջնաժամկետ հորիզոնում, չնայած հարկաբյուջետային քաղաքականանությունը շարունակելու է սահմանափակված մնալ պարտքի կայունացման ապահովման անհրաժեշտությամբ, այնուամենայնիվ, հարկաբյուջետային քաղաքականությունը իրականացվելու է ծախսային կառուցվածքի վերանայմամբ՝ առավել շեշտադրելով կապիտալ ծախսերի իրականացման անհրաժեշտությունը տնտեսական աճի կայուն հիմքերի ապահովման հարցում»։

Վարչապետը շեշտադրեց բյուջեի նախագծի հիմքում ընկած մի քանի դրույթներ։

«Առաջինը՝ վերջին մի քանի տարիներին Հայաստանի տնտեսությունը բնութագրվում է արտաքին աշխարհից ներթափանցող բացասական ցնցումներով, որի արդյունքում գրանցվել է տնտեսական աճի ցածր մակարդակ և այս ճանապարհով նվազեցնելով տնտեսական աճի ներուժը։ Ընթացիկ զարգացումները չնայած հուսադրող են, սակայն տնտեսական աճի հիմքերը դեռևս բավարար ամուր չեն՝ երկարաժամկետ բարձր տնտեսական աճին հավակնելու համար»,- ասաց կառավարության ղեկավարը։

Նրա խոսքով՝ 2017-ին հաստատվեց բյուջետային մի շրջանակ, որը բնորոշում է տնտեսական իրավիճակի կայունացումը։ Ինչ վերաբերում է 2018-ի բյուջետային շրջանակին, Կարեն Կարապետյանը նշեց, որ վերջինով ծրագրել են այնպիսի հարկաբյուջետային քաղաքականություն, որը կկանխորոշի հետագա տնտեսական զարգացումների մեկնարկը։

«Այլ կերպ ասած, առաջարկվող հարկաբյուջետային քաղաքականությունը հիմքեր կստեղծի ապագայում ապահովելով միջինում 5 տոկոսանոց տնտեսական աճ, ինչն էլ հնարավորություն կտա ավելի արդյունավետ լուծել մեր առջև ծառացած խնդիրները, թե կայուն երկարաժամկետ զարգացման առումով, թե սոցիալական բնույթի։ Նշված ցուցանիշին հասնելը մեզնից բոլորից մեծ ջանքեր և ծավալուն աշխատանք կպահանջի»,- ասաց նա։

Երկրորդը դրույթը, վարչապետի խոսքով այն է, որ պետական բյուջեի ծախսային քաղաքականությունը հիմնված է լինելու հստակ կանոնների վրա, որի առանցքում դրվել են ինչպես տնտեսական աճը, երկրի անվտանգությունը, այնպես էլ սոցիալական նպատակայնությունը։

«Նշված քաղաքականությունը կապահովի երկրի գրավչության աստիճանի բարձրացումը՝ ձևավորելով կայուն, երկարաժամկետ, անվտանգ զարգացման ամուր հիմք։ Երրորդ՝ մեր եկամտային քաղաքականությունը լինելու է հավասարակշռված՝ թե ստվերային տնտեսության կրճատմամբ, թե գործարար միջավայրի բարելավման տեսանկյունից։ Այստեղ կարևորվել է արդյունավետ եկամտային համակարգերի հիմքերի ձևավորումը, որը կապահովի հարկային եկամուտների կայուն առաջընթացը ՀՆԱ աճից»,- հավելեց Կարեն Կարապետյանը։