Ձեր վստահելի աղբյուրը

«2018 թվականի բյուջեն փորձ ենք արել նախագծել մեկ ընդհանուր կանոնով՝ կայուն, երկարաժամկետ տնտեսական աճով»,- այսօր ՀՀ 2018 թ. պետական բյուջեի մասին օրենքի նախագծի նախնական քննարկման ժամանակ ասաց ՀՀ ֆինանսների նախարար Վարդան Արամյանը։

Նրա խոսքով՝ 2017 թվականին տնտեսական ակտիվության ցուցանիշում առաջնորդող ճյուղերը եղել են արդյունաբերությունը ծառայությունները և առևտուրը. «Սա մեզ հիմք է տալիս 2017-ի համար ակնկալելու 4-4.3 տոկոսի իրական տնտեսական աճի միջակայքում։ 2017-ին կանխատեսում ենք մի փոքր ավելի բարձր տնտեսական աճ, քան նախատեսված էր 2017 թվականի բյուջեի նախագծով։ Բյուջեի նախագծում դրված էր 3.2 տոկոս տնտեսական աճի ցուցանիշ»։

Վարդան Արամյանը շեշտեց, որ այս տարի տուրիզմի ոլորտում աննախադեպ աճ է գրանցվել՝ 30 տոկոսից բարձր։

Ինչ վերաբերում է 2018 թվականին, ապա նախարարն ասաց, ակնկալվում է, որ տնտեսական աճը կլինի 4.5 տոկոսի շրջանակներում։

«Հիմնական ներդրումները լինելու են արդյունաբերության ոլորտից, ծառայությունների մասով ևս ակնկալում ենք, որ դրական միտումները կպահպանվեն։ Գյուղատնտեսությունը և շինարարությունը ակնկալվում է, որ որոշակի վերականգնման նշաններ ցույց կտան։ Գյուղատնտեսության պոտենցիալ աճը գնահատվում է 3-4 տոկոս»,- ասաց Վարդան Արամյանը։

Ֆինանասների նախարարը հավելեց, որ տնտեսական կայուն աճի համար կարևոր է նաև պետական պարտքի կայունացումը: Նա նշեց, որ կառավարությունը փորձել է ներկայացնել այնպիսի բյուջե, որը 2018թ. հնարավորություն է ընձեռում պետական պարտք-ՀՆԱ ցուցանիշը 1 տոկոսային կետով նվազեցնել:

«2018-ին կանխատեսվում է արտահանման` 8.0 տոկոս, ներմուծման` շուրջ 7.8 տոկոս իրական աճ: Ինչ վերաբերում է արտաքին ապրանքաշրջանառությանը, ապա ներմուծումը կշարունակի աճել՝ կազմելով շուրջ 10 տոկոս: 2018 թվականին` գործընկեր երկրների տնտեսական աճին և ՀՀ կառավարության կողմից տնտեսության արտահանելի ոլորտում վարվող քաղաքականության ուղղությանը համահունչ, կանխատեսվում է արտահանման շուրջ 11.5տոկոս աճ »,- ներկայացրեց Արամյանը։

Նա հայտնեց, որ ակնկալվում է՝  2018 թ. պետբյուջեի եկամուտներ/ՀՆԱ հարաբերակցությունը կկազմի 22.3 տոկոս` 2017 թ. համար հաստատված և 2016 թ. փաստացի 22.4 տոկոսի դիմաց։

«Օտարերկրյա պետություններից և միջազգային կազմակերպություններից բյուջեի նախագծով 2018 թ. ակնկալվում է ստանալ 35,6 մլրդ դրամի չափով պաշտոնական դրամաշնորհներ, իսկ այլ եկամուտների գծով մուտքերը ծրագրվել են 23.8 մլրդ դրամի չափով: 2018 թվականի պետբյուջեի նախագծով ծախսերի ծավալը ծրագրավորվել է շուրջ 1,464.2 մլրդ դրամի չափով»,- ասաց Արամյանը։