Ձեր վստահելի աղբյուրը

«Նման դեպքերում ինտրիգը մշտապես պահպանվում է: Այս դեպքում կապված է ոչ թե փաստաթղթի, այլ կարող է կապված լինել իրադարձությունների զարգացման հետ, այդ թվում նաև Կատալոնիայի»,- ՀՀ-ԵՄ համաձայնագրի ստորագրման թեմայով քննարկմանն ասաց բանակցային գործի մասնագետ, CM&Partners ընկերությունում ավագ խորհրդատու Արթուր Մարտիրոսյանը:

Նա նշեց, որ հայկական կողմին հաջողվել է «կամ-կամ»-ի ձևակերպումից հեռանալ, համոզել Եվրամիությանը, որ հնարավոր է ինտեգրացիա, այսինքն՝ «և-և», և այն իրականում պետք է համապատասխանի հայկական կողմի շահերին:

«Բայց կհասնենք դրան, թե ոչ, այսօր բարդ է ասել: Ավելի հստակ կլինի, երբ տեսնենք, թե ինչպես են զարգանում դեպքերը, այդ թվում նաև Կատալոնիայում»,- նշեց Ա. Մարտիրոսյանը:

Քննարկմանը ներկա Կովկասի ինստիտուտի ղեկավար, քաղաքագետ Ալեքսանդր Իսկանդարյանի խոսքով, համաձայնագրի ստորագրման համար քաղաքական խնդիրներ գրեթե չկան: Նրա կարծիքով, առկա խնդիրները տեխնիկական են:

«Կարծում եմ՝  պայմանագիրը կստորագրվի: Մեծ է հավանականությունը, որ այն ստորագրվի նոյեմբերի 24-ին: Եթե չհասցնեն մինչ այդ, կստորագրեն ավելի ուշ: Եվրոպացիների հետ համաձայնեցված է, խնդիրը կապված է եվրոպական բյուրոկրատիայի հետ: Բայց հավանականությունը, որ չստորագրվի, չափազանց փոքր է», -ասաց քաղաքագետը՝ միաժամանակ հավելելով, որ քաղաքականություն է, երբեք չի կարելի կանխատեսել, ամեն ինչ կարող է վերջին պահին տեղի ունենալ:

«Ուղղակի հիմք չունեմ մտածելու, որ այս կարճ ժամանակահատվածում՝ մինչ համաձայնագրի ստորագրումը, իրավիճակը կտրուկ կփոխվի»,- ասաց Կովկասի ինստիտուտի ղեկավարը: