Ձեր վստահելի աղբյուրը

Պետական եկամուտների կոմիտեի նախագահ Վարդան Հարությունյանը, անդրադառնալով ԱԺ շենքի դիմաց առևտրականների բողոքի ակցիային, լրագրողների հետ զրույցում ասաց, բոլորը պետք է օրենքով սահմանված կարգով հարկերը վճարեն:

«Հարկերից խուսափելու համար, եթե դիմում են նման ատյանների, դուք էլ պիտի հասկանաք ու կանգնեք մեր կողքին, ու բացատրենք, որ չի կարելի միտինգ, ակցիա անելով խուսափել հարկերից: Դա բացառվում է, չի լինելու»,-ասաց ՊԵԿ նախագահը:

Վ. Հարությունյանն ասաց, որ մի քանի օր առաջ առևտրականների հետ հանդիպում է եղել, բացատրել են ինչ պետք է անել:

«Եթե մանիպուլյացիայի միջոցով փորձում են խուսափել հարկերից, չի լինելու: Կոշտ վարչարարություն է լինելու: Բարդ չէ: Մենք առաջարկել ենք ձրի հաշվապահություն, հրաժարվել են դրանից, որովհետև չեն ցանկանում շրջանառությունը ցույց տալ»,-ասաց կոմիտեի ղեկավարը, միաժամանակ ավելացնելով, որ շատ տնտեսվարողներ պահպանում են օրինականությունը:

Նա շնորհակալություն հայտնեց այդ մարդկանց, որոնք օրինակ են ծառայում մյուսների համար:
«Կան մարդիկ, ովքեր ունենալով մեծ հնարավորություններ, բայց թաքնվելով սոցիալապես վատ վիճակում գտնվող խավի տակ, էդ մարդկանց ուղղորդում են այդ քայլին: Իհարկե, ուղղորդողներ կան»,-ասաց նա:

Լրագրողների հարցին ի պատասխան, Վ. Հարությունյանը ուղղորդողների թվում բացառեց Գագիկ Ծառուկյանին, ում պատկանում է «Առինջ մոլ»-ը:

«Գագիկ Ծառուկյանն իմ լավ ընկերն է, իմ բարեկամն է, ինքն էլ իր հեղինակությունն օգտագործելով փորձել է մի քանի օր առաջ առևտրականներին հասկացնել, որ մեր արածը լրիվ օրինականության սահմաններում է: «Առինջ մոլ»-ում տարածք է հատկացրել, որ մենք ավելի մոտիկից բացատրենք ժողովրդին, մենք պատրաստ ենք նման ծառայություն մատուցել մյուս տոնավաճառներում նույնպես: Էդ մարդիկ պետք է հասկանան, որ հետդարձի ճանապարհ չկա, պետք է աշխատել օրինական դաշտում»,-ասաց նա: