Ձեր վստահելի աղբյուրը

Շենգավիթի դատարանում ՊՊԾ գնդի գրավմանը մասնակցած խմբից  11 անդամի դատավարությանը ամբաստանյալ Հովհաննես Հարությունյանի պաշտպան Հայարփի Սարգսյանը հանդես եկավ միջնորդությամբ:

«Այս միջնորդությունը կապ ունի իմ պաշտպանյալի առողջության և կյանքի հետ: Միջնորդություն եմ ներկայացնում Հովհաննես Հարությունյանի խափանման միջոցը վերացնելու մասին»,- նշեց փաստաբանը:

Հ. Սարսգյանի խոսքով, 2016 թ. դեկտեմբերի16-ն Մարդու իրավունքների եվրոպական դատարան ներկայացրել էր գանգատ՝ կապված Հովհաննես Հարությունյանի առողջական վիճակի հետ. «ՄԻԵԴ-ը 2017 թվականի մարտին որոշում էր կայացրել ժամանակավոր միջոց կիրառել և անհապաղ Հ. Հարությունյանին քաղաքացիական հիվանդանոց տեղափոխելու, առողջական վիճակին համապատասխան  բուժօգնություն տրամադրելու մասին, բայց մինչ օրս չի իրականացվել»:

Փաստաբանն ասաց, որ Հ. Հարությունյանը գտնվում է «Նուբարաշեն» քրեակատարողական հիմնարկում, խուցը խոնավ է, իսկ նման պայմաններում նման առողջական խնդիրներ ունեցող մարդը չի կարող մնալ:

«Բժշկական եզրակացությունների համաձայն, Հովհաննես Հարությունյանին  անհապատ անհրաժեշտ է բուժում համապատասխան բժշկական հաստատությունում: Ես ներկայացնում եմ ակնհայտ փաստեր, համապատասխան փաստաթղթեր, որոնք պարզապես  չեք կարող անտեսել,  պարտավոր եք հաշի առնել, միջոցներ ձեռնարկել, որպեսզի իմ պաշտպանյալը գնա և իր հաշվին բուժում ստանա: Պահանջում եմ՝ որպեսզի իմ պաշտպանյալն անհապատ ազատ արձակվի, կալանքը վերացվի: Եթե դատարանը մերժի միջնորդությունը և կալանքից չազատի, ապա այդ դեպքում Հովհաննես Հարությունյանի նկատմամբ որպես կալանավորման այլընտրանքային խափանման միջոց գրավ կիրառել»,- ասաց Հ. Սարգսյանը:

Պաշտպանական կողմը միացավ Հ. Սարգսյանի միջնորդությանը:

Մեղադրող դատախազները հանդես եկան խափանման միջոց ընտրված կալաավորումը պահպանելու օգտին: Դատարանը հեռացավ խորհրդակցական սենյակ՝ որոշում կայացնելու: