Ձեր վստահելի աղբյուրը

Հայաստանն արևային մեծ ներուժ ունի, որը մինչև վերջին տարիներն ամբողջությամբ չէր օգտագործվում: Պետական և մասնավոր հատվածներում մշակված աջակցության մեխանիզմները՝ հարկային և մաքսային  օրենսդրության մեջ փոփոխություններն, այսօր ավելի հասանելի են դարձրել արևայի կայանների գործարկումը: Այսօր կայացած մամուլի ասուլիսի ժամանակ այս մասին ասաց արևային էներգիայի փորձագետ, «Շտիգեն» ընկերության ղեկավար Հայկ Շեկյանը՝ հավելելով, որ արդյունքներն իրենց երկար սպասեցնել չեն տվել:

«Ամառային սեզոնին նման համակարգերի կիրառման դեպքում գազի 90-95 տոկոս խնայողություն է կատարվում: Համակարգերը մեծ պահանջարկ ունեն հատկապես մարզերում, մանավանդ այն բնակավայրերում, որտեղ գազաֆիկացում չկա: Այսպիսի համայնքներում բնակիչները արևային ջրատաքացուցիչներ կարող են ձեռք բերել 7 տարի ժամկետով՝ 7 տոկոս տարեկան տոկոսադրույքով: 4 հոգանոց ընտանիքի ամսական մարումը կկազմի 4500 դրամ»,- ասաց Հայկ Շեկյանը՝ հույս հայտնելով, որ մի քանի տարի անց շատերի տանիքներին հնարավոր կլինի արևային համակարգեր տեսնել:

Արևային էներգիայի փորձագետն ընդգծեց, որ արևային ջերմակայանների համակարգերից կարող են օգտվել ինչպես մեծ կազմակերպություններում, այնպես էլ սեփական տներում և բնակարաններում: Բնակելի շենքերում համակարգը կիրառելի է վերջին երեք հարկերի համար:

«Արևային ջրատաքացուցիչը մեկ լավ հեռախոսի գին ունի, դա այնքան էլ թանկ չէ: Սակայն այս համակարգով ջեռուցում կազմակերպելն այնքան էլ արդյունավետ չէ»,- նշեց բանախոսը:

Հայկ Շեկյանը նշեց, որ 1 ՄՎՏ հզորությամբ արևային կայան հիմնելու համար անհրաժեշտ է 1-1.5 հա տարածք: Ամենակարևորը, որ դրանք մոտ լինեն բարձրավոլտ հոսանքի աղբյուրին:

Մասնագետը տեղեկացրեց, որ արևային վահանակներն աշխատում են 35-40 տարի: Բնապահպաական տեսանկյունից ևս այս սարքերն անվնաս են: