Խորհրդային իրականությունը շարունակվում էր նաև Ստալինից անկախ. իրավապաշտպան

Հասարակություն 11:49 31/10/2017 Հայաստան

Խորհրդային իրականությունը շարունակվում էր նաև Ստալինից անկախ. իրավապաշտպան

Պուտինյան Ռուսաստանը չի կարող հարգել քաղաքական բռնությունների զոհերին: Մոսկվայում ստալինյան բռնաճնշումների զոհերի հիշատակման երեկվա միջոցառումը լոկ երկերեսանիության դրսևորում էր: Այսօր կայացած մամուլի ասուլիսի ժամանակ նման տեսակետ հայտնեց իրավապաշտպան Վարդան Հարությունյանը:

«Ստալինյան բռնաճնշումների տարիներին մարդկանց ճակատագրեր են խեղվել՝ ինչպես հասարակ, այնպես էլ մտավորական խավի ներկայացուցիչների: Խորհրդային իրականությունը, սակայն, շարունակվում էր նաև Ստալինից անկախ: Ընդ որում, եթե Ստալինի ժամանակներում ճնշվում էր կամայական մեկը, ապա հետստալինյան շրջանում կամայականությունների շրջանակները փոքրանում էին, և թիրախավորվում էին առանձին ազատամիտներ»,- նշեց նա:

Անդրադառնալով Հովհ. Թումանյանի անվան թանգարանում վերջերս փակված, աղմկահարույց «Խավարում» ցուցահանդեսին՝ իրավապաշտպանը համոզմունք հայտնեց, որ ցուցադրությունը փակվեց անուններ հրապարակելու, հասցեական լինելու համար:

«Կարծում եմ՝ Հայաստանում Ռուսաստանի դեսպանատունը չէր կարող ՀՀ մշակույթի նախարարին հրահանգել փակել ցուցահանդեսը, հրահանգել կարող էին ավելի բարձր օղակներ»,- համոզմունք հայտնեց Վարդան Հարությունյանը:

Հիշեցնենք՝ Հովհ. Թումանյանի թանգարանում շուրջ 22 օր տևած «Խավարում» ցուցահանդեսը, որը նախատեսվում էր ցուցադրել մինչև աշնան վերջ, մշակույթի նախարարության որոշմամբ սեպտեմբերի 9-ին փակվել էր: Ցուցահանդեսը ներկայացնում էր ստալինյան բռնությունների զոհերին, որոնց թվում էին նաև Հովհաննես Թումանյանի երեք որդիները:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: