Ձեր վստահելի աղբյուրը

Գեղարքունիքի մարզի Գեղամասար համայնքի ղեկավարի թեկնածու Զոյա Գևորգյանը հերյուրանք է որակում մամուլում շրջանառվող այն տեղեկությունները, թե իբր մարզպետ Կարեն Բոթոյանն  անձամբ է ձեռնամուխ են եղել իր օգտին ընտրաքվեների ապահովմանը։ Նման լուրեր, հիշեցնենք, տարածել էր Զոյա Գևորգյանի մրցակից Հակոբ Ավետյանի նախընտրական շտաբը՝ նշելով, որ մարզպետը, կորպուսի հրամանատարի հետ հոկտեմբերի 25-ին այցելել է Գեղամասարի պայմանագրային զորամաս, հանդիպել հրամկազմին և ընդհուպ պայմանագրային զինծառայողներին հրահանգել նոյեմբերի 5-ին ընտրել Զոյա Գևորգյանին:

«Այս ամբողջը հերյուրանք է։ Դա իրենց ոճն է՝ սևացնել մարդկանց։ Ես չեմ ուզում իմ հակառակորդ թեկնածուին վարկաբեկել, բայց այս ամենը հերյուրանք է։ Սա իր հովանավոր, ԱԺ նախկին պատգամավոր Սպարտակ Մելիքյանի ձեռագիրն է։ Նա ամենակեղտոտ ինտրիգների հեղինակն է, հույսը դրել է ընտրակաշառքի վրա։ Ինչ վերաբերում է Հակոբ Ավետյանի նախընտրական շտաբի տարածած այն լուրերին, որ Գեղարքունիքի մարզպետն այցելել է Գեղամասարի պայմանագրային զորամաս և պայմանագրային զինծառայողներին հրահանգել նոյեմբերի 5-ին քվեարկել իմ օգտին, ապա դա ևս հերյուրանք է։

Ի տարբերություն  իրենց՝ մենք գիտենք, որ հրամանատարների և պայմանագրային զինծառայողների խնդիրը մեր սահմանները պաշտպանելն է։ Այստեղ խոսքն արտաքին թշնամու մասին է, իսկ ներքին թշնամին իրենց նմաններն են»,-  զայրացած նշեց Գեղամասարի համայնքի ղեկավարի թեկնածուն՝ հավելելով, որ խղճում է իր րիտասարդ մրցակցին՝ Սպարտակ Մելիքյանի սարդոստայնն ընկնելու համար։

Հարցին՝ արդյոք անձնական կամ բարեկամական կապեր ունի՞ Գեղարքունիքի մարզպետ Կարեն Բոթոյանի հետ, Զոյա Գևորգյանը բացասական պատասխան տվեց՝ հավելելով, որ նրան ընկալում է  լոկ որպես իր վերադաս։

«Ես այս տարածաշրջանում ոչ մի բարեկամ չունեմ։ 21 տարի ղեկավարել եմ իմ համայնքը՝ Շատջրեքը, այստեղ չունենալով ոչ քույր, ոչ եղբայր, ոչ հարազատ։ Ես 7-րդ կամ 8-րդ մարզպետի հետ եմ աշխատում։ Այժմյան մարզպետի հետ էլ համայնքի ղեկավար-մարզպետ հարաբերությունների մեջ եմ »,- նշեց նա։

Իսկ հնարավո՞ր է, որ հերյուրանքի և զրպարտության համար իրավական պատասխանատվության կանչի մրցակցին, հետաքրքրվեցինք Զոյա Գևորգյանից։
«Ես նման հարցերով զբաղվելու ժամանակ չունեմ ։ Ես քարոզարշավի, մարդկանց հետ հանդիպումների մեջ եմ, բացատրում եմ, թե որն է իմ նպատակը, ուր եմ գնում ես, ոչ թե նման թափթփուկների հերյուրաքներին պետք է պատասխանեմ։ Այսօր  իմ նպատակը դա չէ»,- նշեց Գեղամասարի համայնքապետի թեկնածուն։

Թեմայի առնչությամբ Panorama.am-ի թղթակիցը փորձեց զրուցել նաև Գեղարքունիքի մարզպետ Կարեն Բոթոյանի հետ։ Սակայն ավելի ուշ պարզաբանումներ ներկայացրեց վերջինիս մամուլի խոսնակ Զոհրապ Եգանյանը։ Նա մասնավորապես նշեց.

«Որպես Գեղարքունիքի մարզպետ` Կարեն Բոթոյանը խնդիր ունի մարզում տեղի ունենալիք ընտրությունները հավուր պատշաճ կազմակերպելու ևանցկացնելու՝ համապատասխան ՀՀ օրենսդրությանը։ Վարչական լծակների օգտագործման մասին պնդումներն անհիմն են, և խորհուրդ եմ տալիս թեկնածուին նախընտրական քարոզչությունը տանել առանց այլոց հասցեին անհիմն մեղադրանքներ հնչեցնելու։ Այս փուլում թույլ տվեք սահմանափակվել այսքանով։ Ինչ վերաբերում է զորամաս այցելելուն, նախ հորդորում ենք բանակի անունը չշոշափել ՏԻՄ ընտրություններում, իսկ մարզպետի այցերը զորամասեր և դիրքեր կրում են պարբերական բնույթ ու այդ մասին տարածաշրջանում գիտեն, այցերի հետ կապված տրվել են նաև մամուլի հաղորդագրություններ, ինչին կարող են ծանոթանալ բոլորը»: