Ձեր վստահելի աղբյուրը

«2017 թվականի 9 ամիսների համար պետական բյուջեի հարկային եկամուտների աճ ունենք, 49,1 մլրդ դրամի չափով, դա կազմում է 6,3 տոկոս»,- այս մասին այսօր «2018թ. պետական բյուջեի մասին» ՀՀ օրենքի նախագծի քննարկման ժամանակ հայտնեց Պետական եկամուտների կոմիտեի փոխնախագահ Վախթանգ Միրումյանը։

Նա ընդգծեց, որ այս աճը վերաբերում է այն աճին, որը չի պարունակում ԱԱՀ գումարների վերադարձը։

«2017-ից մենք ԱԱՀ գերավճարի վերադարձի գումարներն այլ կերպ ենք հաշվառում։ Այժմ դրանք պարզապես եկամուտներից նվազեցնում ենք, այլ ոչ թե արտացոլում ենք համապատասխան ծախսային հոդվածներով։ Համադրելի պատկեր ստանալու համար իրավիճակը հետևյալն է՝ 9 ամիսների կտրվածքով ունենք ոչ թե արդեն 49.1 մլրդի չափով եկամուտների աճ, այլ 74.5 մլրդ դրամ հարկային եկամուտների աճ, որը նախորդ տարվա համեմատ՝ 9.5 տոկոսով ավելի է: Հարկային մարմինների մասով ունենք 40.5 մլրդ դրամի չափով հարկային եկամուտների աճ, իսկ մաքսայինի մասով՝ 34 մլն դրամ», - մանրամասնեց Միրումյանը:

Նա նշեց, որ հարկային եկամուտների աճն ուղեկցվել է մի քանի ցուցանիշների զուգորդմամբ՝ վարչարարության գործիքներով. «Հարկային ստուգումների թվաքանակը նվազել է շուրջ 48 տոկոսով: Հարկային մարմինները 40.5 մլրդ դրամ հարկային եկամուտների աճն ապահովել են զուգահեռաբար իրականացնելով վարչարարական բարեփոխումները։ Հարկային եկամուտների աճի արդյունքում գերավճարների նվազումը կազմել է 22 մլրդ դրամ»։

Միրումյանի խոսքով՝ առաջին 9 ամիսների միտումները ցույց են տալիս, որ 2017-ին մեր սպասողականը հարկային եկամուտների մասով կազմում է 1տրլ 135 մլրդ դրամ։

Ինչ վերաբերում է 2018 թվականի ակնկալիքներին՝ նա հայտնեց, որ նախատեսվում է 1 տրիլիոն 247. 9 մլրդ դրամ հարկային եկամուտներ գրանցել, ինչը 2017 թվականի ցուցանիշը գերազանցում է 9.9 տոկոսով։

«Հարկեր/ՀՆԱ ցուցանիշը 2018-ին կկազմի 21,3 տոկոս, ինչը նշանակում է, որ երկու տարվա ընթացքում մենք արձանագրում ենք այդ ցուցանիշի 1 տոկոսային կետով աճ»,- ասաց ՊԵԿ փոխնախագահը։

Անդրադառնալով  հարկային օրենսգրքով պայմանավորված փոփոխություններին, Միրումյանը տեղեկացրեց, որ յուրաքանչյուր հարկատեսակի գծով կան գնահատականներ: Ակցիզային հարկի գծով ակնկալում են  16.74 մլրդ դրամ հարկային եկամտի աճ, օղու գծով՝ 1.86, ծխախոտի՝ 4.67, բենզինի և դիզելային վառելիքի՝ 1.93 մլրդ դրամ, սեղմած գազի գծով՝ 7.35 մլրդ դրամ և այլն։

«Իհարկե, սրանք դրական ազդեցություններն են, մինչդեռ օրենսգիրքն ունի նաև բացասական ազդեցություններ։ Օրինակ՝ ԱԱՀ-ի գծով մեր ակնկալիքները կազմում են ընդամենը -3.85 մլրդ դրամ, որովհետև ԱԱՀ հարկի մասին օրենքով եկամուտ բերող որևէ փոփոխություն չկա, փոխարենը կան ազատականացումներ, որոնք չեն կարող բացասական չազդել եկամուտի վրա։ Օրինակ՝ երբ 6 ամսվա կտրվածքով ԱԱՀ-ի գումարները հետ ենք վերադարձնելու տնտեսավարող սուբյեկտներին, օտարերկրյա պետությունում գրանցված տրանսպորտային միջոցների համար վերացնում ենք ճանապարհային վճարը։ Սա էլ էական բացասական ազդեցությունը»,-հավելեց նա։